کاکامیگاہارا: ہندستانی خواتین ہاکی ٹیم نے فائنل میں چین کو 1-0 کے فرق سے شکست دے کر 44 سال بعد گولڈ میڈل اپنے نام کر لیا۔ یہ سب کچھ پہلے کوارٹر میں لالریمسیامی کے 10ویں منٹ میں کیے گئے شاندار گول اور دوسرے کوارٹر میں تجربہ کار گول کیپر سویتا پونیا کے حیرت انگیز پینلٹی اسٹروک سیو کی بدولت ممکن ہو سکا۔ پورے میچ کے دوران دفاعی چیمپئن چین ہندوستان کی دفاعی صف کو توڑنے میں کامیاب نہیں ہو سکا۔ اس طرح ہندوستان اب میڈل ٹیلی میں 16 گولڈ، 25 سلور اور 35 برانز سمیت مجموعی طور پر 76 تمغوں کے ساتھ پانچویں نمبر پر پہنچ گیا ہے۔

ہندوستانی خواتین ہاکی ٹیم نے ایشین گیمز کا آخری گولڈ میڈل 1982 میں کھیلے گئے دہلی ایشیائی کھیلوں میں حاصل کیا تھا، جب پہلی بار خواتین کی ہاکی کو ان کھیلوں میں شامل کیا گیا تھا۔ اب کپتان سلیمہ ٹیٹے کی قیادت اور کوچ میرین کی نگرانی میں ملک کی شیرنیوں نے بہادری کی ایک نئی داستان رقم کر دی۔

ہندوستانی خواتین ٹیم پیرس اولمپکس 2024 کے لیے کوالیفائی نہیں کر سکی تھی۔ ایسے میں یہ جیت انتہائی اہم ہے۔ اب ہندوستان نے لاس اینجلس اولمپکس 2028 کا ٹکٹ بھی حاصل کر لیا ہے۔ پیرس اولمپکس کی سلور میڈل فاتح چین کے خلاف ہندوستان نے دسویں منٹ میں ہی لالریمسیامی کے گول کی بدولت برتری حاصل کر لی تھی، جو آخر تک برقرار رہی۔ اپنا 200واں بین الاقوامی میچ کھیل رہی لالریمسیامی نے گول کے دائیں جانب سے ملنے والی گیند کو براہِ راست گول کے اندر پہنچا دیا۔

دوسرے کوارٹر میں سویتا نے اپنی بائیں جانب ڈائیو لگا کر پینلٹی اسٹروک بچا لیا۔ 300 میچ کھیل چکیں 36 سالہ سابق کپتان سویتا پونیا اگر یہ کامیاب ڈائیو نہ لگا پاتیں تو شاید میچ کا نتیجہ کچھ اور ہوتا۔ بہرحال، چین کو سلور میڈل ملا، جبکہ جاپان نے شوٹ آؤٹ میں کوریا کو شکست دے کر برانز میڈل اپنے نام کیا۔

ہندوستان اور چین کے درمیان فائنل ہندوستانی وقت کے مطابق دوپہر ساڑھے تین بجے شروع ہونا تھا، لیکن سوا چار بجے تک میچ شروع نہیں ہو سکا، کیونکہ ٹیم کی بس راستے میں ٹریفک جام میں پھنس گئی تھی۔ ایک عہدیدار نے بتایا کہ راستے میں ایک حادثے کی وجہ سے یہ ٹریفک جام لگا تھا۔ اس جام کی وجہ سے کھلاڑی اسٹیڈیم دیر سے پہنچے۔