گروگرام: یوٹیوبر دھرو راٹھی کو گروگرام پولیس نے حراست سے رہا کر دیا ہے۔ پولیس نے انہیں ہفتے کی رات تقریباً 3 بجے رہا کیا۔ اس سے قبل ہفتے کی صبح 5 بجے انہیں سیکٹر 56 میں واقع ان کی رہائش گاہ سے حراست میں لیا گیا تھا۔


دھرو راٹھی کو دہلی کے جنتر منتر پر ہونے والے سی جے پی احتجاج میں لوگوں کو ویڈیو کے ذریعے شرکت کی دعوت دینے کے معاملے میں حراست میں لیا گیا تھا۔ گروگرام پولیس نے انہیں احتجاج میں شرکت نہ کرنے کی ہدایت دیتے ہوئے رہا کر دیا۔


یوٹیوبر دھرو راٹھی چیف الیکشن کمشنر گیانیش کمار کے استعفے کے مطالبے پر جنتر منتر پر مجوزہ احتجاج میں شرکت کے لیے دہلی آئے تھے۔ اس سے قبل جمعہ کے روز دھرو راٹھی نے مرکزی حکومت پر الزام لگایا تھا کہ 10 اکتوبر کو جنتر منتر پر سی جے پی کے مجوزہ احتجاج سے پہلے دہلی میں تقریباً لاک ڈاؤن جیسی صورت حال پیدا کر دی گئی ہے۔


دھرو راٹھی نے جمعہ کے روز انسٹاگرام پر شیئر کی گئی ایک ویڈیو میں احتجاج سے پہلے دارالحکومت دہلی میں کیے گئے سخت حفاظتی انتظامات اور ٹرانسپورٹ پر عائد پابندیوں پر سوال اٹھائے تھے۔ انہوں نے کہا تھا کہ میٹرو اسٹیشن بند کر دیے گئے ہیں، ٹرینیں منسوخ کر دی گئی ہیں اور وسطی دہلی کے بعض علاقوں میں موبائل انٹرنیٹ خدمات بھی عارضی طور پر بند کر دی گئی ہیں۔


ویڈیو میں دھرو راٹھی نے کہا تھا، ’’آپ سب کیسے ہیں، دوستو؟ میں دہلی پہنچ گیا ہوں۔ یہاں میں نے دیکھا کہ 50 سے زیادہ میٹرو اسٹیشن بند کر دیے گئے ہیں۔ ٹرینیں بند کر دی گئی ہیں، بسیں منسوخ کر دی گئی ہیں۔ اور ہمارے احتجاج کی وجہ سے وہ تقریباً پوری دہلی کو لاک ڈاؤن میں ڈال رہے ہیں۔‘‘

دھرو راٹھی نے مزید کہا تھا کہ بی جے پی سے وابستہ سوشل میڈیا اکاؤنٹس یہ دعویٰ کر رہے ہیں کہ احتجاج میں بہت کم لوگ شریک ہوں گے، جب کہ مرکزی حکومت خود اتنے بڑے پیمانے پر پابندیاں عائد کر رہی ہے۔ انہوں نے کہا تھا کہ احتجاج کرنا عام لوگوں اور عوام کا آئینی حق ہے۔