National

"کیا خالص پیٹرول تمہارے باپ کے گھر سے آئے گا؟" - ریوا کے بی جے پی ایم پی جناردن مشرا کا متنازع بیان

10/08/26

بھوپال:

مدھیہ پردیش کی ریوا لوک سبھا سیٹ سے بی جے پی کے رکنِ پارلیمنٹ جناردن مشرا نے مرکزی حکومت کی 'ایتھنول بلینڈنگ پالیسی' (پیٹرول میں ایتھنول کی ملاوٹ) کا سخت دفاع کرتے ہوئے ایک نیا تنازع کھڑا کر دیا ہے۔ انہوں نے اس پالیسی کی مخالفت کرنے والوں پر تیکھا حملہ کرتے ہوئے سوال اٹھایا کہ کیا "خالص پیٹرول" ان کے "باپ کے گھر" سے آئے گا؟

مرکزی حکومت کے 20 فیصد ایتھنول ملاوٹ کے ہدف کی حمایت کرتے ہوئے مشرا نے دلیل دی کہ ہندوستان خام تیل کی ضروریات کے لیے اب بھی بڑے پیمانے پر غیر ملکی در آمدات پر منحصر ہے۔

انہوں نے کہا کہ ہندوستان اپنی ضرورت کا صرف 20 فیصد خام تیل خود تیار کرتا ہے، جبکہ بقایا 80 فیصد تیل بیرونِ ملک سے در آمد کرنا پڑتا ہے۔

موجودہ جیو پولیٹیکل (جغرافیائی و سیاسی) صورتحال اور خام تیل کی نقل و حمل میں درپیش چیلنجز کا حوالہ دیتے ہوئے بی جے پی رہنما نے کہا کہ "حالات ایسے ہیں کہ بعض اوقات تیل کے ٹینکروں کو ہندوستان تک سپلائی پہنچانے کے لیے 18,000 کلومیٹر کا اضافی سفر طے کرنا پڑتا ہے۔"انہوں نے ایتھنول سے چلنے والی گاڑیوں کی مخالفت کرنے والوں کو نشانہ بناتے ہوئے اس بات پر زور دیا کہ ہندوستان کو متبادل ایندھن کی ملکی پیداوار بڑھانے کی شدید ضرورت ہے۔ انہوں نے سوال اٹھایا، "اگر ایتھنول تیار نہیں ہوگا، تو پیٹرول اور ڈیزل کہاں سے آئے گا؟"

Source: Admin