National

جے پی ایس سی امتحان دھاندلی معاملے میں ای ڈی کی انٹری

10/08/26

جھارکھنڈ میں جے پی ایس سی کی 14ویں ابتدائی امتحان(پی ٹی) سمیت دیگر امتحانات میں مبینہ دھاندلی کے معاملے میں اب انفورسمنٹ ڈائریکٹوریٹ (ای ڈی) کی بھی انٹری ہوگئی ہے۔ ایجنسی نے CID میں درج FIR نمبر 16/26 کی بنیاد پر منی لانڈرنگ کی تحقیقات کے لیے ECIR درج کی ہے۔ اب امتحانی دھاندلی سے جڑے مالی لین دین اور ممکنہ منی ٹریل کی بھی جانچ کی جائے گی۔ ED کو شبہ ہے کہ امتحان میں مبینہ گڑبڑی کے پیچھے بڑے پیمانے پر پیسوں کا لین دین ہوا ہے۔تحقیقات کے دائرے میں امتحانی دھاندلی سے متعلق مالی لین دین، رقم کے ذرائع اور ممکنہ منی ٹریل شامل ہوسکتے ہیں۔ ایجنسی یہ معلوم کرنے کی کوشش کرے گی کہ مبینہ امتحانی گڑبڑی میں پیسوں کا لین دین ہوا تھا یا نہیں، اور اگر ہوا تو اس میں کون کون لوگ ملوث تھے۔

معاملے کی تحقیقات کے لیے ای ڈی کے رانچی یونٹ سے پانچ رکنی ٹیم پہنچ گئی ہے۔ ٹیم میں ایک اسسٹنٹ ڈائریکٹر اور چار انسپکٹر شامل ہیں۔ ٹیم امتحانی دھاندلی سے جڑے مالی پہلوؤں کی جانچ کرے گی۔ ضرورت پڑنے پر معاملے سے متعلق افراد سے پوچھ گچھ اور اہم دستاویزات کی بھی جانچ کی جاسکتی ہے۔

واضح رہے کہ اتوار کو حکومت کے نمائندہ وفد نے طلبہ کے نمائندہ وفد سے بات چیت کی تھی۔ اس دوران حکومت کی جانب سے کہا گیا تھا کہ امتحانی دھاندلی کی تحقیقات CID کر رہی ہے۔ حکومت نے طلبہ کو یقین دلایا تھا کہ اگر تحقیقات کے دوران کسی مالی گھوٹالے سے متعلق معاملہ سامنے آتا ہے تو اس کی جانچ ای ڈی سے کرانے کی سفارش کی جائے گی۔تاہم حکومت کی اس یقین دہانی سے پہلے ہی ED نے معاملے میں ECIR درج کرکے تحقیقات شروع کردی ہے۔ اس پیش رفت کے بعد امتحانی دھاندلی کے معاملے میں مالی لین دین کی تحقیقات بھی اہم ہوگئی ہے۔

Source: Admin