نئی دہلی: لوک سبھا میں قائد حزب اختلاف راہل گاندھی نے ایپسٹین فائلز اور ہندوستانی وزیر ہردیپ سنگھ پوری کی تصویر کا حوالہ دیتے ہوئے مرکز کی مودی حکومت پر طنز کیا ہے۔ انہوں نے سوال اٹھایا ہے کہ بھارتیہ جنتا پارٹی (بی جے پی) اور راشٹریہ سویم سیوک سنگھ (آر ایس ایس) کے کارکنوں کے خیال میں کس ملک مخالف غدار کو بلیک میل کیا جا رہا ہے۔ دوسری جانب انڈین یوتھ کانگریس نے نئی دہلی میں امریکی سفارت خانے کے باہر احتجاج کرتے ہوئے وزیر اعظم نریندر مودی کے خلاف نعرے لگائے اور ہردیپ پوری کے استعفے کا مطالبہ کیا۔

راہل گاندھی نے سوشل میڈیا پلیٹ فارم ایکس پر اپنی پوسٹ میں لکھا، ’’روبیو ممبئی پہنچے۔ امریکی محکمہ انصاف نے ایپسٹین اور پوری کی تصویر جاری کی۔ بی جے پی اور آر ایس ایس کے عزیز کارکنو! آپ کے خیال میں وہ کس ملک مخالف غدار کو بلیک میل کر رہے ہیں؟‘‘

راہل گاندھی کی یہ پوسٹ امریکی وزیر خارجہ مارکو روبیو کے ممبئی پہنچنے اور امریکی محکمہ انصاف کی جانب سے جیفری ایپسٹین اور ہردیپ سنگھ پوری کی تصویر جاری کیے جانے کے حوالے سے سامنے آئی ہے۔ انہوں نے اس معاملے کو ہندوستان اور امریکہ کے درمیان تجارتی معاہدے سے جوڑتے ہوئے مودی حکومت کو نشانہ بنایا ہے۔

ادھر انڈین یوتھ کانگریس نے ایکس پر احتجاج کی ویڈیو شیئر کرتے ہوئے اسے فوری احتجاج قرار دیا۔ تنظیم نے دعویٰ کیا کہ اس کے کارکنوں نے نئی دہلی میں امریکی سفارت خانے کے باہر احتجاج کیا۔ ویڈیو میں کارکن ہاتھوں میں پوسٹر اٹھائے ہوئے نظر آ رہے ہیں اور ہردیپ سنگھ پوری کے استعفے کا مطالبہ کر رہے ہیں۔

انڈین یوتھ کانگریس نے اپنی پوسٹ میں امریکی صدر ڈونالڈ ٹرمپ سے مطالبہ کیا کہ وہ ایپسٹین فائلز کا استعمال کر کے ہندوستان کو بلیک میل کرنا بند کریں۔ تنظیم نے الزام لگایا کہ امریکہ، وزیر اعظم نریندر مودی پر دباؤ ڈال کر ہندوستان اور امریکہ کے درمیان ایسا تجارتی معاہدہ کرانا چاہتا ہے جس پر سمجھوتے کا سایہ ہو۔

یوتھ کانگریس نے اپنی پوسٹ میں مزید کہا کہ مودی کی قیادت والی بی جے پی کی غلط کاریوں کی وجہ سے ہندوستان کو بلیک میل نہیں کیا جا سکتا۔ تنظیم نے اسے ملک کے وقار اور قومی مفادات سے جوڑتے ہوئے حکومت کو نشانہ بنایا۔