چنئی، 10 ستمبر: تمل ناڈو کے ویلور ضلع میں کاٹ پاڈی کے قریب زیر تعمیر چرچ کی چھت گرنے سے جمعرات کو 3 افراد ہلاک اور 3 دیگر زخمی ہو گئے ۔یہ حادثہ منجو کرشن پورم کے قریب پیش آیا، جہاں ایک چرچ کی تعمیر کا کام جاری تھا۔ مزدور کام کر رہے تھے کہ اچانک پہلی منزل کا ڈھانچہ گر گیا، جس سے کم از کم 6 تعمیراتی مزدور ملبے کے نیچے دب گئے ۔
اطلاع ملنے پر پولیس اور فائر سروس کے اہلکاروں نے مقامی لوگوں کے ساتھ مل کر امدادی کارروائی شروع کی، مزدوروں کو ملبے سے باہر نکالا اور علاج کے لیے سرکاری اسپتال پہنچایا۔ خبروں کے مطابق، 3 مزدوروں کی موت ہو گئی جبکہ باقی زخمی ہیں، جن کا اسپتال میں علاج چل رہا ہے ۔
پولیس کے سینئر افسران، ضلع کلکٹر لیلا الیکس اور کاٹپاڈی کے رکن اسمبلی سدھاکر نے جائے حادثہ کا دورہ کیا اور امدادی کارروائیوں کی نگرانی کی۔ پولیس اور دیگر افسران بھی موقع پر موجود تھے ۔ انہوں نے اسپتال میں زخمیوں سے بھی ملاقات کی۔ خبروں میں یہ بھی کہا گیا ہے کہ امدادی کارروائی میں مدد کے لیے خصوصی آلات سے لیس این ڈی آر ایف کی 30 رکنی ٹیم کو بھی جائے حادثہ پر بھیجا گیا تھا۔
ابتدائی تحقیقات سے پتہ چلا ہے کہ عمارت کا سہارا دینے والا ڈھانچہ یا مچان گر گیا تھا، جس کی وجہ سے کنکریٹ کا حصہ نیچے آ گرا۔ تاہم، حکام نے کہا کہ صحیح وجہ کا ابھی پتہ نہیں چل سکا ہے اور تحقیقات جاری ہیں۔