سوئٹزرلینڈ نے غزہ ہیومینٹیرین فاؤنڈیشن کے جنیوا دفتر کو بند کرنے کی کارروائی شروع کی ہے، اس حوالے سے دفتر کے قیام میں قانونی کوتاہیوں کا حوالہ دیا گیا ہے۔ غزہ ہیومینٹیرین فاؤنڈیشن ایک متنازع امدادی تنظیم ہے جسے امریکہ اور اسرائیل کی حمایت حاصل ہے۔ اس تنظیم نے مئی کے آخر میں غزہ کی پٹی میں خوراک کے پارسل تقسیم کرنا شروع کیے تھے۔ خوراک کی تقسیم امداد کی ترسیل کے ایک نئے ماڈل کا حصہ تھی۔ امداد کی تقسیم مراکز کے قریب فائرنگ میں سینکڑوں فلسطینیوں کی ہلاکت پر اقوام متحدہ کی طرف سے تنقید کی گئی تھی۔ سوئس فیڈرل سپروائزری اتھارٹی فار انٹرپرائزز نے آج سوئس ٹریڈ جرنل میں شائع ہونے والے قرض دہندگان کو ایک نوٹس میں کہا ہے کہ اگر کوئی قرض دہندہ 30 دن کی قانونی مدت کے اندر آگے نہیں آتا ہے تو اتھارٹی تنظیم کو تحلیل کرنے کا حکم دے سکتی ہے۔ اتھارٹی نے رائٹرز کو بتایا کہ غزہ ہیومینٹیرین فاؤنڈیشن بعض قانونی تقاضوں کو پورا کرنے میں ناکام رہی ہے۔ ان قانونی تقاضوں میں بورڈ کے اراکین کی صحیح تعداد، ڈاک کا پتہ، یا سوئس بینک اکاؤنٹ سے متعلق امور شامل ہیں۔ اتھارٹی نے ایک بیان میں کہا کہ غزہ ہیومینٹیرین فاؤنڈیشن نے فیڈرل سپروائزری اتھارٹی کو تصدیق کی ہے کہ اس نے سوئٹزرلینڈ میں کبھی کوئی سرگرمی نہیں کی ہے اور وہ جنیوا میں رجسٹرڈ برانچ کو تحلیل کرنے کا ارادہ رکھتی ہے۔ جنیوا میں حکام نے گزشتہ ہفتے غزہ ہیومینٹیرین فاؤنڈیشن کو ایک علیحدہ قانونی نوٹس جاری کیا تھا جس میں اسے 30 دنوں کے اندر "تنظیمی کوتاہیوں" کو دور کرنے یا ممکنہ قانونی کارروائی کا سامنا کرنے کا حکم دیا گیا تھا۔

Source: social media