اقوامِ متحدہ کی سلامتی کونسل نے شام اور اسرائیل کے زیرِ قبضہ گولان کی پہاڑیوں کے درمیان طویل عرصے سے جاری امن مشن میں چھے ماہ کی توسیع کر دی ہے اور اس خدشے کا اظہار کیا ہے کہ علاقے میں فوجی سرگرمیاں کشیدگی میں اضافہ کر سکتی ہیں۔ شام کے صدر بشار الاسد کی معزولی کے بعد سے اسرائیلی فوجی غیر فوجی علاقے میں منتقل ہو گئے ہیں جو 1973 کی عرب-اسرائیل جنگ کے بعد بنایا گیا تھا - یہاں اقوامِ متحدہ کی ڈس انگیجمنٹ آبزرور فورس (یو این ڈی او ایف) گشت کرتی ہے۔ اسرائیلی حکام نے اسے ملک کی سرحدوں کے تحفظ کو یقینی بنانے کے لیے ایک محدود اور عارضی اقدام قرار دیا ہے لیکن اس بات کی نشاندہی نہیں کی کہ فوجیوں کی واپسی کب تک ممکن ہے۔ جمعہ کو سلامتی کونسل کی منظور کردہ ایک قرارداد میں زور دیا گیا، "فریقین کو اسرائیل اور شامی عرب جمہوریہ کے درمیان افواج کے خاتمے کے لیے 1974 میں ہونے والے معاہدے کی شرائط کی پاسداری اور جنگ بندی پر سختی سے عمل کرنا چاہیے۔" اس میں تشویش کا اظہار کیا گیا کہ "علیحدگی کے علاقے میں کسی بھی فریق کی طرف سے جاری فوجی سرگرمیوں کے باعث اسرائیل اور شامی عرب جمہوریہ کے درمیان کشیدگی بڑھانے، دونوں ممالک کے درمیان جنگ بندی کو نقصان پہنچانے اور مقامی شہری آبادی اور اقوامِ متحدہ کے اہلکاروں کے لیے خطرہ پیدا کرنے کا احتمال ہے۔" جنگ بندی معاہدے کے تحت اسرائیل اور شام کی مسلح افواج کو غیر فوجی زون میں جانے کی اجازت نہیں ہے جو 400 مربع کلومیٹر (155 مربع میل) "علحدگی کا علاقہ" ہے۔ اقوامِ متحدہ کے سکریٹری جنرل انتونیو گوٹیرس نے جمعرات کو کہا: "میں واضح کر دوں: علیحدگی کے علاقے میں اقوامِ متحدہ کے امن فوجیوں کے علاوہ کوئی فوجی دستہ نہیں ہونا چاہئے۔" انہوں نے یہ بھی کہا، شام پر اسرائیل کے فضائی حملے ملک کی خودمختاری اور علاقائی سالمیت کی خلاف ورزی ہیں اور انہیں "رکنا چاہیے۔"

Source: social media