Sports

شاہد آفریدی نے مداح کو دھکا دے دیا، ویڈیو وائرل

26/07/26

کراچی (26 جولائی 2026): پاکستان کرکٹ ٹیم کے سابق کپتان شاہد آفریدی ایک بار پھر کڑی تنقید کی زد میں آ گئے اور اس بار ان کا مداح سے غیر مہذب رویہ ہے۔ پاکستان کرکٹ ٹیم کے سابق کپتان اور مایہ ناز آل راؤنڈر جو آج کل سوشل میڈیا پر کافی فعال رہتے ہیں۔ اس بار ان کی ایک ایسی ویڈیو منظر عام پر آئی ہے، جس کو دیکھ کر ان کے مداح بھی حیران رہ گئے ہیں اور ان پر کڑی تنقید کی جا رہی ہے۔ سوشل میڈیا پر ایک ویڈیو تیزی سے وائرل ہو رہی ہے، جس میں لیجنڈری شاہد آفریدی کو ایک ہجوم میں اپنے مداح کو دھکا دیتے دکھایا گیا ہے۔ ویڈیو میں دیکھا جا سکتا ہے کہ شاہد آفریدی سیکیورٹی حصار میں ایک اسٹیڈیم میں گراؤنڈ سے باہر آتے دکھائی دے رہے ہیں۔ اسی دوران ایک مداح ان کے قریب آنے کی کوشش کرتا ہے۔ تاہم سابق عالمی شہرت یافتہ آل راؤنڈر اس موقع پر سخت رویہ اختیار کرتے ہوئے مداح کو اپنے ہاتھ سے پیچھے دھکا دیتے ہیں اور پھر کچھ غصے میں اس کے پیچھے بھی جاتے ہیں۔ یہ ویڈیو سوشل میڈیا پر وائرل ہوتے ہی شاہد آفریدی ایک بار پھر تنقید کی زد میں آ گئے ہیں اور صارفین کی اکثریت ان سے اپنے اس غیر مہذب رویے پر معافی مانگنے کا مطالبہ کر رہی ہے۔ کئی ایسے صارفین بھی ہیں جو شاہد آفریدی کی حمایت میں ہیں اور ان کا کہنا ہے کہ ویڈیو کا ایک مختصر کلپ سے پوری صورتحال واضح نہیں ہوتی اور کسی کو مورد الزام نہیں ٹھہرایا جا سکتا۔ دوسری جانب شاہد آفریدی کی جانب سے اس وائرل ویڈیو یا اس پر ہونے والی تنقید کے حوالے سے تاحال کوئی باضابطہ بیان سامنے نہیں آیا ہے۔

Source: Admin