Sports

دوسرا ٹیسٹ: پاکستان کی گرفت مضبوط، دوسری اننگ میں ویسٹ انڈیز کی 6 وکٹیں گر گئیں

05/08/26

پورٹ آف اسپین (5 اگست 2026): دوسرے ٹیسٹ میچ میں ویسٹ انڈیز کی دوسری اننگ میں 6 وکٹیں گر چکیں جب کہ صرف 60 رنز کی برتری حاصل ہے۔

پاکستان اور ویسٹ انڈیز کے درمیان دو ٹیسٹ میچوں کی سیریز کے پورٹ آف اسپین میں کھیلے جا رہے دوسرے اور آخری ٹیسٹ میچ میں پاکستان نے میزبان ٹیم کی 6 وکٹیں لے کر اپنی پوزیشن مضبوط کرتے ہوئے دوسرا ٹیسٹ جیت کر سیریز برابر کرنے کا موقع حاصل کر لیا۔

تیسرے دن کا کھیل بولرز کے نام رہا اور مجموعی طور پر 14 وکٹیں گریں۔ کھیل کے اختتام تک ویسٹ انڈیز نے دوسری اننگ میں 6 وکٹوں کے نقصان پر 103 رنز بنا لیے تھے اور اسے پاکستان پر 60 رنز کی برتری مل چکی ہے۔

پاکستانی بولرز نے کسی بھی میزبان بیٹر کو کھل کر کھیلنے کا موقع نہیں دیا۔ اسپنر ساجد خان نے 4 وکٹیں لے کر میچ میں اپنی وکٹوں کی تعداد 8 کر لی جب کہ علی عثمان نے دو کھلاڑیوں کو پویلین بھیجا۔

اس سے قبل پاکستان ٹیم اپنی پہلی اننگ میں 387 رنز بنا کر آؤٹ ہوئی تو اس کو ویسٹ انڈیز پر 43 رنز کی برتری مل چکی تھی۔

عبداللہ شفیق نے نا قابل شکست 160 رنز اسکور کیے۔ کپتان بابر اعظم بدقسمتی سے اپنی 10 ویں سنچری مکمل نہ کر سکے اور 88 رنز پر رن آؤٹ ہو گئے۔ اذان اویس 55 رنز بنا کر نمایاں رہے۔

واضح رہے کہ ویسٹ انڈیز کو دو میچوں کی سیریز میں ایک صفر کی نا قابل شکست برتری حاصل ہے اور پاکستان کو سیریز برابر کرنے کے لیے یہ میچ جیتنا ضروری ہے۔

Source: Admin