سعودی قیادت میں یمنی فورسز نے 24 گھنٹوں کے دوران انصار اللّٰہ کے 30 جنگجوؤں کو ہلاک اور 60 کو زخمی کرنے کا دعویٰ کیا ہے۔

ترک خبر ایجنسی کے مطابق یمنی فورسز نے مغربی یمن کے ضلع الوازعیہ میں فضائی کارروائیوں کے دوران حوثیوں کی متعدد گاڑیوں کو بھی نشانہ بنایا جس سے انہیں نقصان پہنچا۔

علاوہ ازیں سعودی طیاروں نے یمن کے مغربی علاقوں میں حوثیوں کے متعدد ٹھکانوں کو نشانہ بنایا اور 24 گھنٹوں میں 54 فضائی حملے کیے۔

میڈیا رپورٹس کے مطابق یمنی فضائی حدود میں سعودی عرب کو نمایاں برتری حاصل ہے جبکہ حوثیوں کے پاس نہ مؤثر فضائیہ ہے اور نہ مضبوط فضائی دفاعی نظام اور نہ ہی سعودی فضائی کارروائیوں کا مقابلہ کرنے کی قابلِ ذکر صلاحیت۔

میڈیا رپورٹس کے مطابق سعودی عرب اپنی فضائی حدود سے لے کر مقدس مقامات تک جدید دفاعی نظام کے ذریعے اپنی دفاعی صلاحیت کا مظاہرہ بھی کر چکا ہے۔

یاد رہے کہ مکہ مکرمہ کی جانب بڑھنے والے حوثی ڈرون کو سعودی فضائی دفاعی نظام نے فضا ہی میں تباہ کیا تھا۔

سعودی عرب نے مکہ مکرمہ اور مدینہ منورہ سمیت مقدس مقامات کے تحفظ کے لیے دفاعی نظام کی متعدد پرتیں قائم کر رکھی ہیں جن میں پیٹریاٹ فضائی دفاعی نظام، جدید ریڈارز، میزائل لانچرز اور اورلیکن 35 ملی میٹر اینٹی ایئر کرافٹ گنز شامل ہیں۔