نئی دہلی: سپریم کورٹ نے میگھالیہ ہنی مون قتل کیس کی اہم ملزمہ سونم رگھوونشی کی ضمانت منسوخ کرتے ہوئے انہیں تین ہفتوں کے اندر نچلی عدالت کے سامنے خودسپردگی (سرینڈر) کرنے کا حکم دیا ہے۔ عدالتِ عظمیٰ نے واضح کیا کہ سونم اس سنگین کیس میں ضمانت کی حقدار نہیں ہیں۔ جسٹس ایم ایم سندریش اور جسٹس پرسنا بی ورالے پر مشتمل بنچ نے فیصلہ سناتے ہوئے کہا: "گرفتاری کے وقت ملزمہ کو اپنی گرفتاری کی وجوہات کا اچھی طرح علم تھا۔ اگر گرفتاری کے میمو میں محض کچھ ٹائپوگرافیکل (لکھائی کی) غلطیاں تھیں، تو اسے ضمانت کی بنیاد نہیں بنایا جا سکتا۔" عدالت نے مزید کہا کہ مقدمے کی سماعت اس وقت ایک اہم مرحلے میں ہے۔ اگر ٹرائل کی رفتار سست رہتی ہے اور یہ اگلے چھ ماہ کے اندر مکمل نہیں ہوتا، تو ملزمہ دوبارہ ضمانت کی درخواست دائر کرنے کے لیے آزاد ہوں گی۔ اندور کے ٹرانسپورٹ تاجر راجہ رگھوونشی نے 11 مئی 2025 کو سونم سے شادی کی تھی۔ جوڑا اپنے ہنی مون کے لیے میگھالیہ گیا تھا۔ چیراپنجی کے سفر کے دوران راجہ اچانک لاپتہ ہو گئے، جس کے کچھ دن بعد ان کی لاش ایک گہری کھائی سے برآمد ہوئی۔ پولیس تحقیقات میں سنسنی خیز انکشافات ہوئے، جس کے بعد سونم رگھوونشی، ان کے مبینہ عاشق راج کشواہا اور دیگر ساتھیوں کے خلاف قتل کا مقدمہ درج کیا گیا۔ سونم کو 9 جون 2025 کو غازی پور (اتر پردیش) سے گرفتار کیا گیا تھا۔ گرفتاری کے میمو اور کیس ڈائری میں پولیس نے غلطی سے قتل کی دفعہ کے بجائے ضابطہ فوجداری (CrPC) کی دفعہ 403 لکھ دی تھی (جبکہ نیا بھارتیہ نائے سنہیتا کا سیکشن 103 قتل سے متعلق ہے)۔ اس تکنیکی غلطی کا فائدہ اٹھاتے ہوئے نچلی عدالت نے 28 اپریل 2026 کو سونم کو مشروط ضمانت دے دی۔ عدالت کا کہنا تھا کہ ملزم کو گرفتاری کی صحیح وجوہات نہ بتانا آئین کے آرٹیکل 22(1) کی خلاف ورزی ہے۔ 29 جون 2026 کو ہائی کورٹ نے بھی نچلی عدالت کے اس فیصلے کو برقرار رکھا تھا۔ تاہم، سپریم کورٹ نے اب ہائی کورٹ اور نچلی عدالت کے فیصلے کو الٹتے ہوئے سونم کو دوبارہ جیل بھیجنے کا حکم دے دیا ہے۔

Source: Admin