چنئی / بنگلور : مکل نیدھی میئم (ایم این ایم) کے رہنما کمل ہاسن نے تمل ناڈو کے وزیر اعلی اسٹالن سے ملاقات کرکے ان کا شکریہ ادا کیا۔ دونوں کی ملاقات ڈی ایم کے کے صدر دفتر چنئی میں ہوئی۔ کمل ہاسن نے اپنی پارٹی کو راجیہ سبھا سیٹ مختص کرنے پر وزیر اعلیٰ کا شکریہ ادا کیا۔ اس موقع پر کمل ہاسن نے کہا کہ "میں اسٹالن کی دعوت پر یہاں آیا، انہوں نے مجھے راجیہ سبھا کےلئے نامزد کرنے کا اعلان کیا ہے۔ میری آواز پہلی بار راجیہ سبھا میں سنی جائے گی۔ میں تمل ناڈو کے حقوق کے لیے راجیہ سبھا میں اپنی آواز بلند کروں گا۔" کمل ہاسن نے ایک بار پھر واضح کیا کہ وہ اپنے متنازعہ کنڑ ریمارکس پر معافی نہیں مانگیں گے۔ انہوں نے کہا کہ جو کچھ انہوں نے کہا اس میں کوئی خراب بات نہیں ہے، یہ سچ ہے۔ اس پر جان بوجھ کر سیاست کی جا رہی ہے۔ انہوں نے کہا کہ کرناٹک، آندھرا پردیش اور کیرالہ کے لوگ ان کی محبت کو سمجھتے ہیں۔ انہوں نے کہا کہ وہ ایک جمہوری ملک میں قانون پر یقین رکھتے ہیں۔ ہاسن نے کہا کہ ہر کوئی اس بات سے واقف ہے کہ انہیں تمام زبانوں سے سچی محبت ہے اور کسی کو بھی اس سے کوئی مسئلہ نہیں ہوگا سوائے اس کے کہ جن کے پاس "ایجنڈا" ہے۔ مکل نیدھی میئم کے صدر نے کہا کہ "یہ جمہوریت ہے۔ میں قانون اور انصاف پر یقین رکھتا ہوں۔ کرناٹک سے، آندھرا پردیش سے اور کیرالہ سے میری محبت سچی ہے۔ کوئی بھی اس پر شک نہیں کرے گا سوائے ان کے جن کے پاس ایجنڈا ہے۔ مجھے پہلے بھی دھمکیاں دی گئی ہیں اور اگر میں غلط ہوں تو میں معافی مانگوں گا اور اگر ایسا نہیں ہے تو میں معافی نہیں مانگوں گا۔ میرے بیان کو توڑ مروڑ کر پیش کیا گیا۔" کرناٹک کے وزیر پریانک کھرگے نے کہا کہ کمل ہاسن کرناٹک کے لوگوں کی ثقافت اور جذبات سے واقف ہیں۔ کھرگے نے کہاکہ "کمل ہاسن ایک تجربہ کار ہیں۔ وہ بہت سارے لوگوں کے دلوں میں ہیں، وہ ثقافت کو جانتے ہیں۔ اور کرناٹک کے لوگوں کے جذبات کو جانتے ہیں۔ اس کے علاوہ، انہوں نے یہاں پہلے بھی کام کیا ہے اور یہ وہ چیزیں ہیں جو تاریخ میں پہلے ہی دفن ہو چکی ہیں۔" کانگریس کے سربراہ ملکارجن کھرگے کے بیٹے کھرگے نے مزید کہا کہ "مجھے اس کو گھسیٹنے کا کوئی فائدہ نظر نہیں آتا۔ یہ سب دراوڑی زبانیں ہیں۔ ہمارا ایک مشترکہ نسب ہے۔ ہمارا لسانی نسب بھی مشترک ہے اور میں سمجھتا ہوں کہ اب وقت آگیا ہے کہ ہاسن کو لوگوں کے جذبات کو سمجھنا چاہئے۔ ہم یہ نہیں کہہ رہے ہیں کہ تمل بہتر ہے، تلگو بہتر ہے یا ملیالم بہتر ہے۔ ہم سب ایک ہی طرح کے پس منظر سے ہیں۔ ہر زبان کی صفات اور تاریخی پہلو الگ الگ ہے، میرے خیال میں اس کا احترام کیا جانا چاہیے۔" قبل ازیں کمل ہاسن نے چینائی میں "ٹھگ لائف" کے آڈیو لانچ کے موقع پر کہا تھا کہ "تمل نے کنڑ کو جنم دیا"، اس بیان کے بعد پڑوسی ریاست کرناٹک کے لوگوں نے ناراضگی کا اظہار کیا تھا۔ ریاستی بی جے پی کے سربراہ بی وائی وجیندر نے اداکار پر کنڑ زبان کی بے عزتی کا الزام عائد کیا تھا اور معافی مانگنے کا مطالبہ کیا تھا۔ تمل ناڈو میں راجیہ سبھا کے چھ نشستوں کےلئے 19 جون کو انتخابات ہوں گے۔ اس تناظر میں نامزدگی کا عمل 2 جون سے شروع ہو گا۔ ڈی ایم کے پہلے ہی اعلان کر چکی ہے کہ وہ چھ میں سے 4 سیٹوں پر انتخاب لڑے گی۔ جس میں سے ایک سیٹ اپنے اتحادی ایم این ایم کو دینے کا اعلان کیا گیا۔

Source: Social media