گنگٹوک 02 جون : شمالی سکم کے دور افتادہ لاچین میں چاٹن میں ایک عارضی جھونپڑی کے منہدم ہو جانے سے دو فوجی اہلکار اور ایک پورٹر ہلاک اور چھ دیگر لاپتہ ہیں۔ سرکاری ذرائع نے پیر کو بتایا کہ ملبے اور کیچڑ سے زندہ بچ جانے والوں کو نکالنے کے لیے امدادی کارروائیاں جاری ہیں۔ ہندوستانی فوج کے ذرائع نے بتایا کہ اتوار کی شام 7 بجے کے قریب چاٹن میں بڑے پیمانے پر لینڈ سلائیڈنگ میں فوجی کیمپوں کو بہا لے جانے کے بعد چار دیگر افراد کو معمولی زخموں کے ساتھ بچا لیا گیا۔ مرنے والوں کی شناخت حوالدار لکھویندر سنگھ، لانس نائک منیش ٹھاکر اور پورٹر ابھیشیک لکھڑا کے طور پر کی گئی ہے۔ ہندستانی فوج نے ان بہادروں کی موت پر تعزیت کا اظہار کیا ہے۔ رپورٹ آنے تک ملبے میں سرچ آپریشن جاری تھا جس میں چھ اہلکاروں کو تلاش اور نکالا جا رہا تھا۔ یہ لوگ گنگ ٹوک سے تقریباً 110 کلومیٹر کے فاصلے پر انتہائی مشکل علاقے اور موسم کی خراب صورتحال میں لاپتہ ہوئے تھے۔ ہندوستانی فوج نے قدرتی آفت میں اپنی جانیں گنوانے والے بہادروں کے اہل خانہ سے گہری تعزیت کا اظہار کیا۔ آرمی کی ریلیز میں کہا گیا ہے کہ "غم کی اس گھڑی میں سوگوار کنبوں کو ضروری مدد فراہم کرنے کی ہر ممکن کوشش کی جا رہی ہے۔" ایک علیحدہ رپورٹ میں کہا گیا ہے کہ لاچنگ سے 18 سیاحوں کی گاڑیوں کا پہلا قافلہ کامیابی کے ساتھ شمالی ضلع کے لوئر زونگو میں واقع فدانگ پہنچ گیا ہے۔ ضلع کلکٹر منگن اننت جین نے قافلے کی قیادت کی تاکہ اس بات کو یقینی بنایا جاسکے کہ سیاحوں کو بحفاظت واپس لایا جائے۔ لاچنگ سے سیاحوں کا انخلا آج صبح مقامی انتظامیہ، پولیس، فوج، بی آر او، آئی ٹی بی پی، محکمہ جنگلات، لاچنگ ڈزمسا، ٹی اے اے ایس، ایس ایچ آر اے، ڈرائیورز ایسوسی ایشن، سیاحت کے دیگر اسٹیک ہولڈرز اور مقامی عوام کی مربوط کوششوں سے شروع ہوا۔ تازہ ترین اپ ڈیٹ کے مطابق،284 گاڑیوں، 16 موٹرسائیکلوں کے ساتھ 1678 سیاحوں (مرد- 737، خواتین- 561، بچے- 380) کا سیاحتی قافلہ تھینگ چیک پوسٹ کو عبور کر کے پھڈانگ کی طرف بڑھ گیا ہے۔ مسٹر جین نے بچاو کارروائی میں شامل تمام لوگوں کی کوششوں کی تعریف کی۔ انہوں نے بتایا کہ لاچنگ سے تمام سیاحوں کو آج لاچنگ-چنگتھانگ-سیفر-فیڈانگ راستے سے بحفاظت واپس گنگٹوک پہنچایا جائے گا۔ انہوں نے مزید بتایا کہ لاچن تک سڑک رابطہ بحال کرنے کی کوششیں جاری ہیں۔ سڑک کے تیار ہونے کے بعد لاچین میں پھنسے ہوئے سیاحوں کو بھی نکال لیا جائے گا۔

Source: uni urdu news service