نئی دہلی، 02 جون :راجیہ سبھا کے لیے آسام اور تمل ناڈو کی کل آٹھ سیٹوں کے لیے 19 جون کو ہونے والے انتخابات کے لیے پیر کو نوٹیفکیشن جاری کر دیا گیا۔ نوٹیفکیشن کے ساتھ ہی دونوں ریاستوں میں انتخابات کے لیے نامزدگی کا عمل شروع ہو گیا ہے۔ راجیہ سبھا میں آسام کی ان دو سیٹوں کے موجودہ نمائندوں کی میعاد 14 جون کو ختم ہو رہی ہے اور تمل ناڈو کی چھ سیٹوں کے نمائندوں کی میعاد 24 جولائی کو ختم ہو رہی ہے۔ الیکشن کمیشن کے جاری کردہ پروگرام کے مطابق ان انتخابات کے لیے کاغذات نامزدگی 9 جون تک بھرے جاسکتے ہیں، کاغذات نامزدگی کی جانچ پڑتال 10 جون کو ہوگی اور 12 جون تک نام واپس لیے جاسکیں گے، اگر ضرورت پڑی تو 19 جون کو صبح 9 بجے سے شام 4 بجے تک ووٹنگ ہوگی۔ اس میں متعلقہ ریاستوں کے اراکین اسمبلی ووٹ ڈالیں گے۔ ووٹوں کی گنتی ووٹنگ مکمل ہونے کے ایک گھنٹے بعد کی جائے گی۔ کمیشن نے کہا ہے کہ ووٹنگ کا پورا عمل 23 جون تک مکمل کر لیا جائے گا۔ کمیشن نے ریاستی اسمبلی کے ایڈیشنل سکریٹری راجیو بھٹاچاریہ کو الیکشن آفیسر اور اسمبلی کے او ایس ڈی (جوائنٹ سکریٹری) پردیپ ہانڈک کو آسام میں انتخابات کے لئے اسسٹنٹ الیکشن آفیسر کے طور پر مقرر کیا ہے۔ تمل ناڈو میں اسمبلی کے ایڈیشنل سکریٹری بی سبرامنیم کو الیکشن آفیسر اور اسمبلی کے جوائنٹ سکریٹری کے رمیش کو اسسٹنٹ الیکشن آفیسر کے طور پر مقرر کیا گیا ہے۔ ی

Source: uni urdu news service