بھیلواڑہ، 24 مئی (: راجستھان کے بھیلواڑہ ضلع کے منڈل تھانہ علاقے میں گائے کی اسمگلنگ کے شبہ میں مشتعل ہجوم کے ایک پک اپ گاڑی کو آگ لگا نے اور تین لوگوں کے ساتھ وحشیانہ طورپر مار پیٹ کرنے کا معاملہ سامنے آیا ہے ۔ پولیس کے مطابق جمعہ کی رات دیر گئے پھولیا خورد گا¶ں کے رہنے والے راجو لوہار، پرتاپ گڑھ کے رہنے والے ناہر محمد اور پک اپ ڈرائیور گوپال رائگر ہمیر گڑھ کے علاقے سے دو جرسی گائے اور ایک بچھڑا خریدنے کے بعد پک اپ گاڑی میں پھولیا خورد واپس آ رہے تھے ۔ اسی دوران منڈل پولس چوکی کے نزدیک کچھ لوگوں نے زبردستی ان کی پک اپ گاڑی کو روکا۔ پک اپ میں موجود لوگوں نے لوگوں کو یہ سمجھانے کی کوشش کی کہ انہوں نے جانور قانونی طور پر خریدے ہیں اور اس میں کوئی غیر قانونی سرگرمی شامل نہیں ہے ۔ اس کے باوجود بھیڑ نے ان کی ایک نہ سنی۔ حالات کشیدہ ہونے پر پک اپ میں سوار لوگ خود قریبی منڈل پولیس اسٹیشن گئے اور معاملے کی اطلاع دی۔ چوکی پر موجود پولیس اہلکاروں نے تمام صورتحال کا جائزہ لیا اور جانوروں کی خریداری کے بارے میں تفصیلات حاصل کیں اور واضح کیا کہ تمام سرگرمیاں قانونی ہیں۔ اس کے بعد پولیس نے پک اپ کو آگے جانے کی اجازت دے دی۔ بتایا گیا کہ پوسٹ سے کچھ ہی فاصلے پر ایک ہجوم پھر سے جمع ہوا اور پک اپ کو دوبارہ روک دیا۔ اس کے بعد حالات پرتشدد ہو گئے ۔ ہجوم نے تینوں افراد کو گاڑی سے نیچے اتارا اور ان کے ہاتھ پیر باندھ دیئے ۔ مشتعل افراد نے جانوروں کو باہر نکالا اور پک اپ گاڑی کو آگ لگا دی۔ کچھ ہی دیر میں پک اپ مکمل طور پر جل کر راکھ ہو گئی۔ اطلاع ملنے پر تھانہ منڈل پولیس موقع پر پہنچی اور تینوں بندھے ہوئے افراد کو بچا یا۔ پولیس نے فوری طورپر کارروائی کرتے ہوئے نامعلوم افراد کے خلاف معاملہ درج کر لیا۔

Source: Uni News