نئی دہلی: وزیر اعظم نریندر مودی نے جمعرات کو کہا کہ مغربی بنگال حکومت کا مقصد یہ یقینی بنانا ہے کہ کوئی بھی اہل خاتون اناپورنا اسکیم کے فوائد سے محروم نہ رہے اور حکومت اس مقصد کو حاصل کرنے کے لیے مسلسل کام کر رہی ہے۔ وزیر اعظم نے مغربی بنگال حکومت کی جانب سے منعقدہ ’اناپورنا دیوس‘ پروگرام سے آن لائن خطاب کرتے ہوئے کہا کہ ماؤں، بہنوں اور بیٹیوں کی زندگی سے جڑے ہر مسئلے کا حل کرنا بی جے پی حکومت کی ترجیح رہی ہے۔ مودی نے کہا، ’’مغربی بنگال میں ہماری حکومت بننے کے چند ہی دنوں کے اندر اناپورنا اسکیم پر کام شروع ہوگیا تھا۔

آج کئی خواتین کو براہ راست ان کے بینک کھاتوں میں مالی امداد مل رہی ہے۔ کوئی درمیانی شخص نہیں ہے اور نہ ہی کوئی ’کٹ منی‘ ہے۔ ہماری حکومت کا مقصد یہ یقینی بنانا ہے کہ کوئی بھی اہل خاتون اناپورنا اسکیم کے فائدے سے محروم نہ رہے۔ ہم اس مقصد کو حاصل کرنے کے لیے مسلسل کام کر رہے ہیں۔‘‘ انہوں نے کہا کہ اس مقصد کے لیے یہاں تیزی سے کام بھی کیا جا رہا ہے۔

وزیر اعظم نے کہا کہ اس اسکیم کے تحت بنگال میں خواتین کے بینک کھاتوں میں ہر ماہ ایک مقررہ رقم جمع کی جائے گی، ایسی رقم جس کے لیے انہیں کسی دوسرے شخص پر انحصار نہیں کرنا پڑے گا۔ مودی نے کہا، ’’یہ ان کے لیے ایک بڑا سہارا ہے۔ آج تقریباً ڈیڑھ کروڑ بہنوں کے کھاتوں میں اناپورنا اسکیم کی چوتھی قسط پہنچ رہی ہے۔

اس اسکیم کے تحت ہر ماہ 3 ہزار روپے دیے جا رہے ہیں۔‘‘ انہوں نے کہا، ’’ہم سمجھتے ہیں کہ مغربی بنگال کی خواتین کے پاس فیصلے کرنے کی طاقت اور آگے بڑھنے کا حوصلہ، دونوں ہونا چاہیے۔‘‘ وزیر اعظم نے یہ بھی کہا کہ اناپورنا اسکیم کے ذریعے مغربی بنگال کی ماؤں اور بہنوں کو بااختیار بنانے کی ایک نئی کوشش ہوئی ہے۔

مودی نے کہا، ’’میں اس اسکیم سے فائدہ اٹھانے والی ہر ماں اور بہن کو مبارک باد دیتا ہوں اور ان کے لیے نیک خواہشات کا اظہار کرتا ہوں۔ خاندان میں ہماری ماؤں اور بہنوں کے کندھوں پر بہت سی ذمہ داریاں ہوتی ہیں۔ چھوٹے بڑے کئی فیصلوں کے درمیان ایک خاتون ہر طرح سے خاندان کی دیکھ بھال کرتی ہے، اور جب ضروری اخراجات کی فکر کم ہوجاتی ہے تو ان کا اعتماد مزید بڑھ جاتا ہے۔‘‘ انہوں نے کہا کہ اناپورنا اسکیم بنگال کی خواتین کا اعتماد مضبوط کرنے کی ایک اہم کوشش ہے۔