سعودی عرب کے شہر طائف میں حوثی باغیوں نے ڈرون حملہ کیا ہے۔ سعودی سکیورٹی فورسز نے ڈرون کو فضا میں ہی مار گرایا، ڈرون کا ملبہ گرنے سے یمنی شہری ہلاک جبکہ ایک سعودی اور ایک پاکستانی شہری زخمی ہو گیا۔
عرب نیوز نے سعودی سول ڈیفنس کے ترجمان کے حوالے سے رپورٹ کیا کہ ڈرون کو حوثی دہشت گرد ملیشیا کی جانب سے لانچ کیا گیا تھا۔
ڈرون کے گرنے کے نتیجے میں یمنی شہریت رکھنے والا ایک رہائشی ہلاک جبکہ ایک سعودی اور ایک پاکستانی شہری شدید زخمی ہوا۔
واقعے میں متعدد عمارتوں اور گاڑیوں کو بھی نقصان پہنچا ہے۔
سعودی شہری دفاع کے مطابق واقعے کے بعد حفاظتی اور ہنگامی اقدامات پر عمل درآمد کیا گیا۔
اس سے قبل سعودی وزارت دفاع نے کہا تھا کہ سعودی فضائی دفاعی نظام نے مکہ مکرمہ کی فضائی حدود میں داخل ہونے کی کوشش کرنے والے ایک حوثی باغیوں کے ایک ڈرون کو تباہ کر دیا۔
اس ڈرون کو منگل کو سعودی وقت کے مطابق شام چھ بج کر 50 منٹ پر مکہ کے جنوب میں انٹرسیپٹ کیا گیا۔

سعودی عرب کے محکمہ سول ڈیفنس کے ترجمان کے مطابق طائف میں شہری دفاع کو ایک ڈرون کے گرنے کی اطلاع موصول ہوئی جسے متعلقہ حکام نے مداخلت کرکے تباہ کیا تھا۔