نئی دہلی، 26 جولائی :لوک سبھا میں ارکان نے جمعہ کو ملک میں من مانے ہوائی کرایوں کی شکایت کرتے ہوئے حکومت کو کرایوں کو معقول رکھنے کی ضرورت پر زور دیا اور اس کے لیے ایک ریگولیٹری نظام بنانے کا مشورہ دیا۔ ہوائی خدمات میں من مانی سے متعلق ’غیر سرکاری اراکین کے لیے قرارداد‘ پر بحث میں حصہ لیتے ہوئے کانگریس کے شفیع پرمبیل نے کہا کہ سال 2009 میں اراکین پارلیمنٹ کی جانب سے اپنے اپنے علاقوں میں ریل خدمات کا مطالبہ کیا گیا تھا، اب ہوائی خدمات کا مطالبہ کیا جا رہا ہے۔ انہوں نے کہا کہ چونکہ فضائی خدمات نجی شعبے میں چلی گئی ہیں، وہ آفت میں مواقع تلاش کرتے ہیں۔ سال کے آخر میں، تہواروں اور دوسرے پرہجوم مواقع کے دوران، نجی ایئر لائنز کرایوں میں نمایاں اضافہ کردیتی ہیں۔ انہوں نے کہا کہ فضائی خدمات کو بہتر بنانے اور کرایوں میں کمی کے لیے ڈائریکٹوریٹ جنرل آف سول ایوی ایشن کو مضبوط بنانے کی کوشش کی جانی چاہیے۔ مسٹر دوبے نے کہا کہ کانگریس حکومت کی پالیسیوں کی وجہ سے ایئر انڈیا کو نقصان ہوا، جس کی وجہ سے اسے فروخت کرنا پڑا۔ اس کے برعکس مودی حکومت نے بھارت سنچار نگم لمیٹڈ اور مہانگر ٹیلی فون نگم لمیٹڈ کو فروخت نہیں کیا جس کی وجہ سے آج موبائل فون کال ریٹ سستے ہیں۔ انہوں نے کہا کہ آج تک عوام سابقہ ​​کانگریس حکومتوں کی پالیسیوں کے برے اثرات سے پریشان ہیں۔ کانگریس کے گرجیت سنگھ اوجلا نے کہا کہ ایئر لائن کمپنیوں نے سفری کرایہ وصول کرنے میں من مانی کا مظاہرہ کیا ہے۔ چنڈی گڑھ دہلی سے صرف 225 کلومیٹر کے فاصلے پر ہے، لیکن یہاں کا کرایہ سات سے 15 ہزار روپے تک ہے۔ انہوں نے کہا کہ 35 منٹ کی پرواز کے لیے اس طرح کا کرایہ کسی بھی طرح درست قرار نہیں دیا جا سکتا۔ مسٹر اوجلا نے کہا کہ ایئر لائنز ایسا اس لیے کر رہی ہیں کیونکہ ہوا بازی کا شعبہ نجی ہاتھوں میں ہے۔ انہوں نے کہا کہ مودی حکومت پبلک سیکٹر کی کمپنیوں کو بیچ رہی ہے، جس کی وجہ سے اس طرح کے مسائل سامنے آرہے ہیں۔ انہوں نے یہ بھی کہا کہ ہوائی کرایوں کو کم کرنے کے لیے ریگولیٹری باڈی کو مضبوط کرنے کی ضرورت ہے۔ انہوں نے بزرگ مسافروں کو کرایوں میں رعایت اور خصوصی مراعات دینے کا مطالبہ کیا۔ انہوں نے کہا کہ وہ پرائیویٹ ممبر بل کی حمایت کرتے ہیں۔

Source: uni news service