عمران خان نے او سی آئی کارڈ منسوخ کرنے کے نوٹس کے پیچھے موجود شواہد طلب کر لیے
اوورسیز سٹیزن آف انڈیا (او سی آئی) کارڈ رکھنے والے اداکار عمران خان نے حکام سے مطالبہ کیا ہے کہ وہ وہ شواہد فراہم کریں جن کی بنیاد پر ان کے کارڈ کو منسوخ کرنے پر غور کیا جا رہا ہے۔ جمعرات کو خان نے فارنرز ریجنل رجسٹریشن آفس (ایف آر آر او) کی جانب سے جاری کردہ ”لیو انڈیا نوٹس“ کو چیلنج کیا، جس میں انہیں 28 اکتوبر تک ملک چھوڑنے کی ہدایت دی گئی تھی۔ یہ نوٹس ممبئی پولیس کی جانب سے ایک احتجاجی مقام پر انہیں حراست میں لیے جانے کے بعد جاری کیا گیا تھا۔ اب بمبئی ہائی کورٹ نے اس نوٹس پر 2 نومبر تک روک لگا دی ہے۔
22 اکتوبر کو دی گئی اپنی تحریری درخواست میں خان نے ایف آر آر او کو بتایا کہ 17 اکتوبر کو انہیں جاری کیے گئے وجہ بتاو¿ نوٹس میں ممبئی پولیس کی جانب سے جمع کرائی گئی دستاویزات اور ایک رپورٹ کا حوالہ دیا گیا تھا۔ تاہم، ان کا کہنا تھا کہ حکام نے یہ دستاویزات انہیں فراہم نہیں کیں۔ وجہ بتاو¿ نوٹس کے ذریعے کسی شخص سے وضاحت طلب کی جاتی ہے کہ اس کے خلاف کارروائی کیوں نہ کی جائے۔
خان نے یہ بھی کہا کہ نوٹس میں ان سے منسوب بیان ”نامکمل“ تھا۔ انہوں نے الزام لگایا کہ ممبئی پولیس نے ایف آئی آر درج کیے جانے کے سلسلے میں ان کا بیان ریکارڈ کرنے کی ”کوشش تک نہیں کی“۔ ان کا کہنا تھا کہ ان کے خلاف کارروائی سے پہلے انہیں اپنا موقف پیش کرنے کا منصفانہ موقع نہیں دیا گیا۔
ان کی درخواست میں کہا گیا، ”مجھے وہ تمام مواد دیکھنے کا موقع فراہم کیا جانا چاہیے جس پر آپ انحصار کر رہے ہیں۔ مذکورہ درخواست کے ساتھ متعلقہ مواد کا انکشاف اور اسے فراہم کرنے سے مجھے شہریت قانون کے قانونی ضابطے کے مطابق اپنا موقف پیش کرنے کا مناسب موقع ملے گا۔“
اداکار نے کہا کہ دستاویزات فراہم کرنے کی ضرورت اس لیے بھی زیادہ ہے کیونکہ نوٹس میں دی گئی وجوہات ”غیر واضح اور متضاد“ ہیں۔ ان کا استدلال تھا کہ متعلقہ مواد دستیاب کرانے سے فیصلہ سازی کے عمل میں ”شفافیت، انصاف اور جواب دہی“ یقینی بنائی جا سکے گی۔
انہوں نے یہ بھی نشاندہی کی کہ دستاویزات فراہم کرنے سے حکام کو کوئی نقصان نہیں ہوگا، لیکن ان تک رسائی نہ ہونے کی صورت میں وہ مناسب جواب دینے سے محروم رہ سکتے ہیں اور ان کا او سی آئی درجہ خطرے میں پڑ سکتا ہے۔ انہوں نے کہا، ”درخواست کردہ مواد فراہم کرنے سے آپ کے دفتر کو کوئی نقصان نہیں پہنچے گا، لیکن وجہ بتاو¿ نوٹس کا مناسب جواب دینے میں میری ناکامی کے نتیجے میں میرا او سی آئی کارڈ منسوخ ہو سکتا ہے۔“
عمران خان نے حکام سے اپیل کی کہ وہ اس بات کو مدنظر رکھیں کہ وہ 42 سال سے بھارت میں رہ رہے ہیں اور انہوں نے یہیں اپنی زندگی اور خاندان بسایا ہے۔ان کی درخواست میں کہا گیا، ”میں جاری کارروائی میں تعاون کرنے کے لیے پ±رعزم ہوں۔ مجھے یقین ہے کہ آپ کے دفاتر میری درخواست پر فوری کارروائی کریں گے اور اسے ضروری اہمیت دیتے ہوئے جلد فیصلہ کریں گے۔“
بمبئی ہائی کورٹ نے منگل کو ”لیو انڈیا نوٹس“ پر 2 نومبر تک روک لگا دی۔ ایف آر آر او نے معاملے پر جواب دینے کے لیے مزید وقت طلب کیا اور عدالت کو یقین دہانی کرائی کہ امریکی شہری خان کو 28 اکتوبر کی اصل آخری تاریخ تک بھارت چھوڑنے کے لیے نہیں کہا جائے گا۔
یہ نوٹس اس وقت جاری کیا گیا جب خان 10 اکتوبر کو ممبئی کے آگست کرانتی میدان کے قریب نوجوانوں کی قیادت میں ہونے والے احتجاج میں موجود تھے۔ مظاہرین انتخابی فہرستوں میں مبینہ بے ضابطگیوں کے معاملے پر چیف الیکشن کمشنر گیانیش کمار کے استعفے کا مطالبہ کر رہے تھے۔