یمن کے حوثی باغیوں نے پیر کے روز ایک بار پھر سعودی عرب میں فوجی اہداف کو میزائلوں اور ڈرونز کے ذریعے نشانہ بنانے کا دعویٰ کیا ہے۔

حوثیوں کے مطابق حملوں میں درجنوں ڈرونز اور میزائل استعمال کیے گئے۔ حملوں کے بعد سعودی سول ڈیفنس حکام نے یمن کی سرحد کے قریب واقع شہروں خمیس مشیط اور ابہا میں مختصر حفاظتی وارننگ جاری کی۔

حوثی باغیوں نے حالیہ عرصے میں بحیرہ احمر کے ساحلی علاقوں اور آبنائے باب المندب کے اطراف اپنی موجودگی اور کنٹرول کو مزید مضبوط کیا ہے۔ امریکہ اور ایران کے درمیان جنگ کے دوران آبنائے ہرمز میں جہاز رانی متاثر ہونے کے بعد اس متبادل سمندری راستے کی اہمیت میں نمایاں اضافہ ہوا ہے۔

سعودی شہر خمیس مشیط کے ایک رہائشی نے خبر رساں ادارے اے ایف پی کو بتایا کہ انھوں نے ’شدید دھماکوں‘ کی آوازیں سنیں، جن کے بعد آگ بھڑک اٹھی اور کافی دیر تک شعلے بلند ہوتے رہے۔ ان کے بقول، ’صورتحال اتنی خوفناک تھی کہ ہم پوری رات سو نہیں سکے۔‘