حزب اللہ کے سیکریٹری جنرل شیخ نعیم قاسم نے تنظیم کے غیر مسلح ہونے کی تمام تجاویز کو مسترد کرتے ہوئے واضح کیا ہے کہ حزب اللہ ہرگز اپنے ہتھیار نہیں ڈالے گی۔

المنار ٹی وی پر نشر ہونے والی ایک نشریات میں خطاب کرتے ہوئے شیخ نعیم قاسم نے لبنان اور اسرائیل کے درمیان امریکی ثالثی میں طے پانے والے فریم ورک معاہدے کو ایک بار پھر یکسر مسترد کر دیا۔

انہوں نے کہا کہ حزب اللہ اس معاہدے کو ہرگز قبول نہیں کرتی اور تنظیم کسی بھی ایسے اقدام یا طریقہ کار پر رضامند نہیں ہوگی جس کے نتیجے میں اسے اپنے ہتھیار چھوڑنے پڑیں یا اس کی عسکری سرگرمیوں کی باہر سے نگرانی کی جائے۔

واضح رہے کہ امریکی ثالثی میں ہونے والے ان مذاکرات میں حزب اللہ کو غیر مسلح کرنے اور جنوبی لبنان سے اسرائیلی فوج کے انخلا کی تجاویز زیرِ غور رہی ہیں۔

حزب اللہ کے سربراہ نے اس عزم کا اعادہ کیا کہ اس طرح کے معاہدے لبنان کی قومی خودمختاری کے خلاف ہیں اور تنظیم ملکی دفاع کے لیے اپنے ہتھیاروں کے مؤقف پر ڈٹی رہے گی۔