بالی ووڈ انڈسٹری کے گلوکار و اداکار ہمیش ریشمیا کے والد میوزک ڈائریکٹر ویپن ریشمیا 87 سال کی عمر میں چل بسے۔ میڈیا کی رپورٹس کے مطابق ویپن ریشمیا نے گزشتہ رات 8 بج کر 30 منٹ پر ممبئی کے کوکیلا بین دھیرو بھائی امبانی اسپتال میں آخری سانس لی۔ ویپن ریشمیا کو سانس لینے میں دشواری اور صحت کی پیچیدگیوں کی وجہ سے اسپتال میں داخل کرایا گیا تھا۔ 87 سالہ ویپن ریشمیا بالی ووڈ انڈسٹری کے تجربہ کار میوزک ڈائریکٹر اور گلوکار ہمیش ریشمیا کے والد تھے۔ میڈیا رپورٹس کے مطابق ویپن ریشمیا کی آخری رسومات آج جوہو میں ادا کی جائیں گی جہاں ان کی میت کو پہلے گھر لایا جائے گا اور انہیں آخری خراجِ عقیدت پیش کیا جائے گا۔ دوسری جانب بالی ووڈ گلوکار کمار سانو نے آج صبح سوشل میڈیا پر ویپن ریشمیا کی موت پر افسوس کا اظہار کیا ہے۔ انہوں نے آنجہانی ویپن ریشمیا کی ایک پرانی تصویر شیئر کرتے ہوئے انہیں خراجِ عقیدت پیش کیا ہے۔

Source: social media