پاکستان کے سابق وزیر اعظم عمران خان کے لیے مشکلات کا دور ختم ہی نہیں ہو رہا ہے۔ انہیں اسپتال سے ایک بار پھر جیل بھیج دیا گیا ہے۔ سپریم کورٹ کے حکم کو پیش نظر رکھتے ہوئے عمران کو سخت سیکورٹی کے درمیان شفا انٹرنیشنل اسپتال منتقل کیا گیا تھا، لیکن 6 گھنٹے کے اندر ہی طبی جانچ کے بعد انہیں دوبارہ اڈیالہ جیل واپس بھیج دیا گیا۔ یہ معاملہ اب ایک ڈرامہ جیسا معلوم ہونے لگا ہے جس میں کئی اتار چڑھاؤ بہت تیزی کے ساتھ دیکھنے کو مل رہے ہیں۔ کبھی ایسا لگتا ہے جیسے عمران خان کو راحت مل جائے گی، لیکن پھر شہباز حکومت اور فوجی چیف عاصم منیر کچھ نیا لے کر سامنے آ جاتے ہیں۔



ذرائع نے بتایا ہے کہ اڈیالہ جیل واپس منتقلی کے بعد بانی پی ٹی آئی کو ان کے سیل میں شفٹ کر دیا گیا ہے۔

اس سے قبل عمران خان کو سخت سیکیورٹی حصار میں اڈیالہ جیل سے شفا انٹرنیشنل اسپتال منتقل کیا گیا تھا۔

عمران خان کی شفا انٹرنیشنل اسپتال منتقلی سے قبل آئی جی اسلام آباد نے پولیس افسران کے ہمراہ اسپتال کا دورہ کیا اور سیکیورٹی انتظامات کا جائزہ لیا۔

شفا انٹرنیشنل اسپتال کے باہر سیکیورٹی کے سخت انتظامات کیے گئے تھے اور پولیس کی بھاری نفری تعینات تھی۔
اسلام آباد پولیس نے شفا اسپتال آنے اور جانے والے راستے ٹریفک کےلیے بند کیے ہوئے تھے۔

شفا انٹرنیشنل اسپتال کے ذرائع کا کہنا تھا کہ بانی پی ٹی آئی کے علاج کے لیے خصوصی اقدامات کیے گئے، بانی پی ٹی آئی کا چیک اپ کیا جائے گا، 6 ماہر ڈاکٹروں کی ٹیم بانی پی ٹی آئی کا چیک اپ کرے گی، چیک اپ کے بعد بانی پی ٹی آئی کو اسپتال میں داخل کرنے سے متعلق فیصلہ ہوگا۔

بانی پی ٹی آئی کو ایڈمٹ کرنے کی صورت میں بھی خصوصی اقدامات مکمل کرلیے گئے تھے۔

وفاقی وزیر طارق فضل چودھری نے بانی پی ٹی آئی کو بیرونِ ملک بھیجنے کا امکان بھی ظاہر کیا تھا۔

واضح رہے کہ سپریم کورٹ نے بانی پی ٹی آئی کو دو روز میں شفا انٹرنیشنل اسپتال منتقل کرنے کا حکم دیا تھا۔

گزشتہ روز سپریم کورٹ کے رجسٹرار آفس نے بانی پی ٹی آئی کی اسپتال منتقلی کے خلاف دائر نظر ثانی درخواست بعض اعتراض لگا کر واپس کردی تھی۔

وفاقی وزیر اطلاعات عطا تارڑ نے سوشل میڈیا پر جاری ایک بیان میں تصدیق کی ہے کہ سابق وزیر اعظم عمران خان کو طبی معائنوں کے بعد ہسپتال سے دوبارہ اڈیالہ جیل منتقل کر دیا گیا ہے۔

ایکس پر اپنے بیان میں عطا تارڑ نے لکھا کہ ’سپریم کورٹ کے فیصلے کی روشنی میں ’قیدی‘ کو 20 اور 21 اگست 2026 کی درمیانی شب مناسب حفاظتی انتظامات کے تحت ہسپتال لے جایا گیا۔‘

عطا تارڑ کے مطابق ’ماہرِ امراضِ چشم، ماہرِ امراضِ قلب اور فزیشن سمیت مستند ڈاکٹروں کی ٹیم نے ان کا تفصیلی معائنہ کیا اور انھیں طبی طور پر صحت مند قرار دیا۔‘

عطا تارڑ کے مطابق ’ان کی ہمشیرہ محترمہ عظمیٰ خان، طبی معائنے اور علاج کے تمام مراحل کے دوران موجود رہیں۔ یہ تمام عمل مکمل ہونے کے بعد انھیں 21 اگست 2026 کی صبح تقریباً 0500 بجے اڈیالہ جیل واپس منتقل کر دیا گیا ہے۔‘

Source: Admin