تاریخی جادو پور یونیورسٹی میں جاری کشیدگی اور مبینہ ملک دشمن نعرے بازی کو لے کر سیاسی محاذ آرائی شدید ہو گئی ہے۔ بھارتیہ جنتا پارٹی (بی جے پی) کے رہنما اور سابق ریاستی صدر دلپ گھوش نے یونیورسٹی میں تنازع کے حوالے سے سخت انتباہ دیتے ہوئے 'سرجیکل اسٹرائیک' کی دھمکی دی ہے، جبکہ اس سے قبل جادہ پور کی ایم ایل اے شربری مکھرجی نے بھی ملک دشمن سرگرمیوں کو برداشت نہ کرنے کا انتباہ دیا تھا۔


اطلاعات کے مطابق بدھ کی رات جادہ پور یونیورسٹی کے اوربندو بھون میں ایک جی بی میٹنگ کے دوران شدید ہنگامہ آرائی ہوئی۔ الزام ہے کہ راشٹریہ سویم سیوک سنگھ کی طلبا تنظیم 'ابھیل بھارتیہ ودیارتھی پریشد' کے کچھ اراکین میٹنگ میں داخل ہوئے اور سوال اٹھایا کہ جب طلبا یونین ہی موجود نہیں تو جی بی میٹنگ کس بنیاد پر کی جا رہی ہے۔ اس پر الیکٹرانکس اینڈ ٹیلی کمیونیکیشن انجینئرنگ اسٹوڈنٹس ایسوسی ایشن کے اراکین اور 'ابھیل بھارتیہ ودیارتھی پریشد' کے درمیان شدید جھڑپ ہوئی۔ دونوں جانب سے ایک دوسرے پر تشدد کے الزامات لگائے گئے اور زخمیوں کو علاج کے لیے قریبی ہسپتال میں داخل کرایا گیا۔
اس واقعے کے بعد جمعرات کی صبح بائیں بازو کی طلبا تنظیم SFI اور ABVP دونوں نے متوازی ریلیوں اور احتجاجی مظاہروں کا اعلان کیا، جس کے بعد یونیورسٹی کیمپس کا ماحول مزید کشیدہ ہو گیا۔

ایم ایل اے شربری مکھرجی نے جمعرات کو شدید برہمی کا اظہار کرتے ہوئے کہا:

"جادو پور کو ریاست مخالف مشینری بنانے کی اجازت نہیں دی جائے گی۔ ہم ملک دشمن نعرے اور تحریکیں ہرگز نہیں چلنے دیں گے۔ ہم سب سے پہلے اس ملک کے شہری ہیں، اس لیے ملک کے حق میں بات کرنی ہوگی۔ یہاں ملک دشمن الفاظ یا 'انشاء اللہ، آزادی' جیسے نعرے نہیں چلیں گے۔"


جمعہ کی صبح صبح کی سیر کے دوران میڈیا سے بات کرتے ہوئے بی جے پی رہنما دلپ گھوش نے کہا:

"میں اندور گیا ہوا تھا، اس لیے مجھے تمام تفصیلات کا علم نہیں ہے، لیکن ملک دشمن سرگرمیاں کسی قیمت پر برداشت نہیں کی جائیں گی۔ حکمراں جماعت TMC نے ایسے عناصر کو پال رکھا ہے۔ ABVP نے پہلے بھی سرجیکل اسٹرائیک کی ہے، اور اگر جادہ پور میں ملک دشمن نعرے لگے تو دوبارہ سرجیکل اسٹرائیک کی جائے گی۔ بس ۶ مہینے انتظار کریں، بہت کچھ ہونے والا ہے۔"

فی الوقت جادو پور یونیورسٹی کی صورتحال انتہائی حساس بنی ہوئی ہے اور پولیس کیمپس اور اطراف کے علاقوں پر کڑی نظر رکھے ہوئے ہے۔

Source: Admin