National

سخت فیصلوں کا خوف:4 ماہ میں 22 پھانسیاں دینے والے جج سے قتل کے 100 کیسز واپس، دوسری عدالت منتقل

20/08/26

اتر پردیش کے ضلع مظفر نگر کی فاسٹ ٹریک کورٹ کے سینیئر جج روی کمار دیواکر سے قتل اور سنگین جرائم کے تقریباً 100 مقدمات واپس لے کر ڈسٹرکٹ اینڈ سیشن جج ویریندر کمار سنگھ کی عدالت میں منتقل کر دیے گئے ہیں۔
سرکاری وکیل کے مطابق یہ تمام مقدمات موت یا عمر قید کی سزا کے قابل تھے۔

ڈسٹرکٹ بار ایسوسی ایشن کے صدر برمود تیاگی نے بتایا کہ لگاتار ملنے والی سخت سزاؤں کے باعث وکلاء اور فریقین میں شدید خدشات پیدا ہو گئے تھے کہ اس عدالت سے پھانسی کی سزاؤں کا سلسلہ یوں ہی جاری رہے گا۔

جج روی کمار دیواکر پچھلے چار ماہ کے دوران 22 افراد کو سزائے موت سنا چکے ہیں، جس کے بعد وہ شدید خبروں میں آئے۔

46 سالہ جج اس سے قبل 2022 میں وارانسی کے مشہور 'گیان واپی کمپلیکس' کا ویڈیو گرافی سروے کرانے کا تاریخی حکم جاری کر کے سرخیوں میں آئے تھے۔
لکھنؤ کے رہائشی، بی کام اور ایل ایل ایم کی ڈگری ہولڈر روی کمار دیواکر نے 2009 میں اعظم گڑھ سے اپنے عدالتی سفر کا آغاز کیا اور نومبر 2025 سے مظفر نگر میں ایڈیشنل ڈسٹرکٹ اینڈ سیشن جج کے طور پر خدمات انجام دے رہے ہیں۔

Source: Admin