پنجابی گلوکار اور اداکار دلجیت دوسانجھ کے کنسرٹ کے پیش نظر دہلی میٹرو ریل کارپوریشن (ڈی ایم آر سی) نے مسافروں کی سہولت کے لیے خصوصی انتظامات کیے ہیں۔ 30 اکتوبر کو جواہر لال نہرو (جے ایل این) اسٹیڈیم میں منعقد ہونے والے ’اورا انڈیا ٹور 2026‘ کے پیش نظر دہلی میٹرو کی تمام لائنوں پر رات 12 بجے تک ٹرین خدمات دستیاب رہیں گی۔ حالانکہ ایئرپورٹ ایکسپریس لائن اور گروگرام کی ریپڈ میٹرو پر یہ سہولت نافذ نہیں ہوگی۔

دہلی میٹرو کے مطابق کنسرٹ میں تقریباً 70 ہزار شائقین کی آمد متوقع ہے۔ ان میں سے بڑی تعداد میٹرو سے سفر کر سکتی ہے۔ اسی کے پیش نظر معمول کے اوقات کے بعد بھی ٹرین خدمات جاری رکھنے کا فیصلہ کیا گیا ہے۔ اس کے علاوہ مسافروں کی بھیڑ کے پیش نظر پورے میٹرو نیٹورک پر ٹرینوں کے اضافی پھیرے بھی لگائے جائیں گے۔ ضرورت پڑنے پر اضافی بھیڑ کو سنبھالنے کے لیے اسٹینڈ بائی ٹرینیں بھی تیار رکھی جائیں گی۔


کنسرٹ کے مقام کے سب سے قریب وائلٹ لائن کا جے ایل این اسٹیڈیم میٹرو اسٹیشن ہے۔ یہاں مسافروں کی آمد و رفت کو ہموار رکھنے کے لیے خصوصی انتظامات کیے جائیں گے۔ اس کے ساتھ ہی اہم انٹرچینج اسٹیشنوں پر بھی اضافی اسٹاف تعینات رہے گا، جو مسافروں کو درست سمت میں رہنمائی کرنے اور بھیڑ کو قابو میں رکھنے میں مدد کرے گا۔

یہ بھی پڑھیں : دلجیت دوسانجھ کے کنسرٹ کو آخر مل ہی گئی منظوری، دہلی پولیس نے کئی میٹنگوں کے بعد لیا فیصلہ
مسافروں کی سیکورٹی اور سہولت کے لیے جے ایل این اسٹیڈیم میٹرو اسٹیشن پر اضافی سیکورٹی اہلکار تعینات کیے جائیں گے۔ داخلی دروازے پر ڈور فریم میٹل ڈیٹیکٹر (ڈی ایف ایم ڈی) اور سیکورٹی جانچ کے اضافی انتظامات کیے جائیں گے۔ اس کے علاوہ، کسٹمر سروس ملازمین اور مسافروں کی رہنمائی کرنے والے اہلکاروں کی تعداد بھی بڑھائی جائے گی، تاکہ مسافروں کو اسٹیشن پر کسی طرح کی پریشانی نہ ہو۔


میٹرو کی توسیعی خدمات کے پیش نظر ’دہلی میٹرو سارتھی‘ موبائل ایپ سے کیو آر ٹکٹ خریدنے کی سہولت کا وقت بھی ایک گھنٹہ بڑھایا جائے گا۔ ڈی ایم آر سی نے کنسرٹ میں آنے والے لوگوں سے ذاتی گاڑیوں کے بجائے میٹرو استعمال کرنے کی اپیل کی ہے، تاکہ وہ آسانی اور محفوظ طریقے سے سفر کر سکیں اور سڑکوں پر گاڑیوں کا دباؤ بھی کم ہو۔