مقبوضہ مغربی کنارے میں نابلس کے جنوب مغرب میں واقع گاؤں تل کے قریب جمعے کو ہونے والی جھڑپوں میں چار فلسطینی اور ایک اسرائیلی ہلاک ہوگیا، جبکہ جھڑپوں کے آغاز کے بارے میں فلسطینی اور اسرائیلی مؤقف ایک دوسرے سے مختلف ہیں۔ فلسطینی وزارتِ صحت نے کہا کہ چاروں فلسطینی اسرائیلی فوج کی فائرنگ سے ہلاک ہوئے، جبکہ چار دیگر زخمی ہوئے جن میں سے تین کی حالت تشویشناک ہے۔ وزارت کے مطابق یہ واقعہ اس وقت پیش آیا جب گاؤں کے رہائشیوں نے آبادکاروں کے حملے کا مقابلہ کیا۔ وزارت نے ایک مختصر بیان میں کہا کہ آبادکاروں نے تل میں فلسطینی گھروں پر حملہ کیا اور ان پر براہِ راست گولیاں چلائیں۔ طبی ذرائع کے مطابق ہلاکتوں میں مزید اضافے کا خدشہ ہے۔ دوسری جانب، اسرائیلی امدادی سروسز نے بتایا کہ تل گاؤں اور حفات گلعاد نامی اسرائیلی بستی کے قریب ہونے والی جھڑپوں میں ایک اسرائیلی ہلاک ہوگیا۔ ایک فلسطینی عینی شاہد نے بی بی سی کو بتایا کہ گاؤں کے رہائشی تقریباً 30 آبادکاروں کا مقابلہ کرنے گئے تھے جو علاقے میں فلسطینی گھروں پر حملے کر رہے تھے۔ اس کے برعکس، اسرائیلی فوج کا کہنا ہے کہ چند اسرائیلی شہری پیدل چل رہے تھے جن پر حملہ کیا گیا، جس کے بعد فوج نے ان کے دفاع کے لیے مداخلت کی۔ اسرائیلی اخبار ’یسرائیل ہیوم‘ نے اسرائیلی موقف نقل کرتے ہوئے دعویٰ کیا کہ ایک فلسطینی نے ایک بستی کے سکیورٹی اہلکار سے اسلحہ چھین لیا اور اسرائیلیوں پر فائرنگ کی۔ بنجمن نیتن یاہو نے اپنے دفتر سے جاری کردہ ایک بیان میں کہا کہ ہم دہشت گردوں اور انہیں بھیجنے والوں کے خلاف سختی سے کارروائی کریں گے۔ انہوں نے مزید کہا کہ وہ اس خونریز حملے کے جواب پر غور کرنے کے لیے سکیورٹی عہدیداروں کے ساتھ ایک میٹنگ کریں گے۔ اسرائیل نے اس سے پہلے اعلان کیا تھا کہ مغربی کنارے میں فائرنگ کے ایک واقعے میں ایک شخص ہلاک اور دو زخمی ہو گئے ہیں جبکہ فلسطینی وزارت صحت نے اسرائیلی فورسز کی فائرنگ سے کم از کم چار فلسطینی شہریوں کے جاں بحق ہونے کی اطلاع دی ہے۔

Source: Admin