برطانوی فضائیہ (آر اے ایف) نے ایک ہاک ٹی 2 تربیتی جنگی طیارے کے حادثے کے بعد احتیاطی اقدام کے طور پر ہاک طیاروں کی تربیتی پروازیں عارضی طور پر معطل کر دی ہیں۔

طیارہ ویلز کے جزیرے اینگلسی میں واقع آر اے ایف ویلی اڈے سے تربیتی پرواز پر تھا کہ قریب ہی پینکارنیسیوگ کے علاقے میں گر کر تباہ ہو گیا۔ حادثے سے چند لمحے قبل دونوں پائلٹ طیارے سے ایجیکٹ کر کے پیراشوٹ کی مدد سے باہر نکلنے میں کامیاب رہے۔

شمالی ویلز پولیس کے مطابق دونوں پائلٹوں کو معمولی نوعیت کی چوٹیں آئی ہیں اور ان کا علاج جاری ہے، جبکہ زمین پر کسی شخص کے زخمی ہونے یا بڑے پیمانے پر نقصان کی اطلاع نہیں ملی۔

سوشل میڈیا پر گردش کرنے والی ویڈیو میں دیکھا جا سکتا ہے کہ دونوں پائلٹ طیارے سے نکلنے کے بعد فضا میں پیراشوٹ کے ذریعے نیچے آ رہے ہیں، جبکہ طیارہ زمین سے ٹکرا کر آگ کے شعلوں میں گھِر جاتا ہے۔ عینی شاہدین کے مطابق طیارہ رہائشی علاقے اور ایک کارواں پارک کے قریب گرا، تاہم خوش قسمتی سے کوئی جانی نقصان نہیں ہوا۔

کارواں پارک کے مالک رچرڈ اوون نے مقامی میڈیا کو بتایا کہ حادثے کے وقت انھوں نے دو دھماکوں کی آوازیں سنیں اور بعد ازاں جائے وقوعہ کے قریب آگ کے شعلے اور طیارے کا ملبہ دیکھا۔ ان کے مطابق طیارے کا کچھ حصہ کارواں پارک کے قریب آ گرا تھا۔

ایک اور عینی شاہد اولی زیلوٹ نے بتایا کہ انھوں نے پہلے دھماکے کے بعد دھواں اٹھتے دیکھا اور جب قریب پہنچے تو آگ کے بڑے شعلے نظر آئے۔ ان کا کہنا تھا کہ انھیں سب سے زیادہ تشویش اس بات کی تھی کہ حادثہ عمارتوں کے بہت قریب پیش آیا۔

برطانوی فضائیہ نے کہا ہے کہ حادثے کی مکمل تحقیقات شروع کر دی گئی ہیں اور تحقیقات مکمل ہونے تک ہاک طیاروں کی پروازیں معطل رہیں گی۔ اطلاعات کے مطابق اس پابندی کا اطلاق ریڈ ایروز ایروبٹک ٹیم پر بھی ہوگا، کیونکہ وہ بھی ہاک طیارے استعمال کرتی ہے۔ تاہم ٹیم کی اگلی طے شدہ فضائی نمائش فرانس کے لی ٹوکے ایئر شو میں ہے۔

مقامی حکام نے اس واقعے کو ’بڑی تباہی سے معجزانہ بچاؤ‘ قرار دیتے ہوئے کہا ہے کہ طیارہ آبادی اور کارواں پارک کے انتہائی قریب گرا، جس کے باعث جانی نقصان کا خدشہ تھا۔

اینگلسی کے مقامی کونسلر نیویل ایونز نے کہا کہ یہ خوش قسمتی تھی کہ طیارہ گرنے کے باوجود زمین پر موجود کوئی شخص زخمی نہیں ہوا۔