چندی گڑھ / نئی دہلی:سابق بھارتی کرکٹر اور بھارتیہ جنتا پارٹی (BJP) کے راجیہ سبھا رکنِ پارلیمنٹ ہربھجن سنگھ سوشل میڈیا پر ایک متنازع ویڈیو شیئر کرنے کے بعد شدید تنقید کا نشانہ بن گئے ہیں۔ ہربھجن سنگھ نے سڑک کنارے دو عمامے (پگڑی) پہنے ہوئے افراد کی عجیب و غریب حرکات و سکنات والی ویڈیو شیئر کی تھی، جسے مبینہ طور پر "زومبی ڈرگ" کے اثرات کے طور پر پیش کیا گیا۔ انہوں نے اسے پنجاب کا واقعہ سمجھتے ہوئے ریاست میں منشیات کے بگڑتے حالات پر شدید دکھ کا اظہار کیا تھا۔ تاہم، حقائق کی جانچ سے یہ بات سامنے آئی کہ مذکورہ ویڈیو پنجاب کی نہیں بلکہ بی جے پی کی حکومت والی ریاست راجستھان کے ضلع سری گنگا نگر کی ہے۔ اس انکشاف کے بعد پنجاب حکومت اور عام آدمی پارٹی کے رہنماؤں نے بی جے پی ایم پی کو آڑے ہاتھوں لیا۔



پنجاب پولیس نے ہربھجن سنگھ کی پوسٹ کا فوری نوٹس لیتے ہوئے سوشل میڈیا پر ایک وضاحتی بیان جاری کیا۔ پنجاب پولیس نے لکھا: "گردش کرنے والی یہ ویڈیو راجستھان کے شہر 'سری گنگا نگر' کی ہے، پنجاب کی نہیں—اور اس کا پنجاب پولیس سے کوئی تعلق نہیں ہے۔ صرف بیک گراؤنڈ میں پنجابی آڈیو کا ہونا کسی واقعے کو پنجاب کا واقعہ نہیں بنا دیتا۔"
پولیس نے صارفین اور عوامی شخصیات کو ہدایت کی کہ وہ کسی بھی مواد کو شیئر کرنے اور پنجاب پولیس کو ٹیگ کرنے سے پہلے مقام اور حقائق کی تصدیق ضرور کر لیا کریں۔
ویڈیو کا سچ سامنے آنے کے بعد پنجاب کے وزراء نے ہربھجن سنگھ اور بی جے پی پر سخت حملے کیے. کابینہ وزیر ڈاکٹر بلجیت کور نے X پر لکھا:"اپنے سیاسی آقاؤں کو خوش کرنے کی تڑپ دیکھیے۔ وہ راجستھان کی ویڈیو شیئر کر کے جھوٹ بول رہے ہیں کہ یہ پنجاب کی ہے۔ بی جے پی کے سیاسی مفادات کے لیے ریاست کا نام خراب کیا جا رہا ہے، پنجابی انہیں اس بدنامی کے لیے کبھی معاف نہیں کریں گے۔"ایک اور کابینہ وزیر ہربھجن سنگھ ای ٹی او نے تنقید کرتے ہوئے کہا:"یہ بی جے پی کا پرانا طریقہ کار ہے: جھوٹی خبریں بنانا اور ہربھجن جیسے لوگوں کو استعمال کر کے پنجاب کو مسلسل بدنام کرنا۔ ویڈیو راجستھان کی ہے لیکن وہ اس ریاست کا امیج خراب کرنے کے لیے جھوٹ بول رہے ہیں جس نے انہیں تمام پہچان اور کیریئر دیا۔ پنجابی اس گندی پرپگنڈا سیاست کو اچھی طرح سمجھتے ہیں۔"سوشل میڈیا پر بھی صارفین کی جانب سے سابق کرکٹر کو بغیر تصدیق کے غلط معلومات پھیلانے پر شدید ٹرولنگ اور تنقید کا سامنا ہے۔

Source: Admin