امریکی صدر ڈونلڈ ٹرمپ سے جاپانی شہر ہیروشیما کے میئر نے کہا ہے کہ وہ ایرانی تنصیبات پر حالیہ امریکی بمباری کے بعد ضروری ہے کہ ایک مرتبہ ہیروشیما کا دورہ کریں اور امریکی جوہری ہتھیاروں سے متاثرہ افراد سے ملاقات کریں۔ جنہیں امریکی فوج نے 1945 میں جوہری بموں سے نشانہ بنایا تھا۔ میئر نے اپنے بیان میں کہا ہے کہ مجھے محسوس ہوتا ہے کہ صدر ٹرمپ جوہری بموں کی بمباری کے اثرات سے اچھی طرح آگاہ نہیں ہیں کہ ان بموں کے استعمال سے بہت سارے لوگوں کی زندگیاں اس فرق کے بغیر چلی جاتی ہیں کہ وہ دوست تھے یا دشمن۔ یہ بم نسل انسانی کے لیے خطرہ ہیں۔ میئر نے ان خیالات کا اظہار رپورٹرز سے گفتگو کے دوران کیا ہے۔ انہوں نے کہا میں چاہتا ہوں کہ صدر ٹرمپ ایک بار جوہری بموں کا نشانہ بنانے والے علاقوں میں ضرور آئیں تاکہ ان بموں کے اثرات کی حقیقت کو سمجھ سکیں اور سمجھ سکیں کہ امریکہ کے جوہری بموں کی وجہ سے ہیرو شیما کے لوگوں کی زندگیوں پر کیا گزری تھی۔ یاد رہے امریکہ نے ہیروشیما پر 6 اگست 1945 کو جوہری بم استعمال کیے تھے۔ امریکہ دنیا کا وہ پہلا ملک ہے جس نے اب تک جوہری ہتھیاروں کا استعمال کیا ہے۔ ہیروشیما پر بمباری کے بعد امریکہ نے تین دن بعد جاپان ہی کے شہر ناگاساکی پر بمباری کی۔ امریکی جوہری بموں کے استعمال کے نتیجے میں 1 لاکھ 40 ہزار افراد ہیروشیما میں اور 74 ہزار افراد ناگاساکی میں ہلاک ہوئے تھے۔ جبکہ جوہری بموں کے ریڈیائی اثرات سے متاثرہ لوگوں کی بڑی تعداد ان کے علاوہ تھی۔ امریکہ نے اب 21 جون کو ایرانی جوہری تنصیبات پر حملہ کیا ہے۔ پچھلے بدھ کو امریکی صدر ڈونلڈ ٹرمپ نے کہا تھا کہ میں نہیں چاہتا کہ ہیروشیما کا نام لوں اور ناگاساکی کی مثال دوں۔ لیکن یہ لازماً ایک ہی جیسی باتیں ہیں کہ اس حملے میں بھی جنگ عظیم دوم کا خاتمہ کیا تھا اور ایرانی جوہری تنصیبات پر حملہ کر کے بھی جنگ کا خاتمہ کیا گیا ہے۔ صدر ٹرمپ کے اس بیان سے ہیروشیما اور ناگاساکی کے متاثرہ خاندانوں میں بہت ردعمل آیا ہے۔

Source: social media