سابق رکن پارلیمنٹ عتیق احمد کے بیٹے ابان احمد کی جمعرات (6 اگست) کو جھانسی میں سڑک حادثے میں موت ہوگئی۔ اپنے بھائی کی موت پراحزم احمد (عتیق احمد کا ایک اور بیٹا) نے کہا کہ اللہ کی چیزتھی، اللہ نے لے لی۔ انہوں نے کہا کہ اس سے زیادہ وہ اس موضوع پرکچھ نہیں کہیں گے۔ اپنے بھائی کی سڑک حادثے میں موت کے بعد جھانسی کے اسپتال میں احزم احمد پہنچے تھے۔ وہاں پولیس بڑی تعداد میں تعینات تھی۔


جھانسی کے اسپتال میں عتیق احمد کے بیٹے ابان احمد کی لاش کا پوسٹ مارٹم کردیا گیا۔ ایڈیشنل پولیس سپرنٹنڈنٹ (دیہات) اروند کمار نے جانکاری دیتے ہوئے بتایا کہ سابق رکن پارلیمنٹ عتیق احمد کا بیٹا ابان احمد اپنے کچھ دوستوں کے ساتھ جھانسی جیل میں بند اپنے بھائیوں سے ملنے جا رہا تھا، تبھی راستے میں پنچھ تھانہ علاقے میں جھانسی-کانپور نیشنل ہائی وے پراس کی تیز رفتارسے گزررہی کار(ایس یووی) بے قابوہوکرایک ڈیوائیڈرسے ٹکرا کرپلٹ گئی۔

ایس ایس پی بی بی جی ٹی ایس مورتی نے میڈیا کو بتایا کہ اس حادثے کی اطلاع پولیس کوجمعرات کو صبح ساڑھے 10 بجے ملی تھی۔ انہوں نے کہا کہ اس حادثے میں ابان احمد (21 سال) اور اس کے دوست سونو (25 سال) کی موت ہوگئی۔ مورتی نے بتایا کہ حادثے میں زخمی کارسواراعظم، محد جاوید اورعمرکو جھانسی میڈیکل کالج میں داخل کرایا گیا ہے۔ انہوں نے بتایا کہ وہ سبھی پریاگ راج کے ہی رہنے والے ہیں۔ پولیس معاملے کی جانچ کررہی ہے۔


ابان احمد، عتیق احمد کے سب سے چھوٹے بیٹے تھے۔ اُمیش پال قتل کیس کے بعد ابان اوران کے بھائی احزم احمد کوکم عمری کے باعث بچوں کے تحفظاتی ادارے (بال سدھارگرہ) میں رکھا گیا تھا۔ بعد ازاں اکتوبر2023 میں دونوں بھائیوں کو وہاں سے رہا کرکے ان کی پھوپھی کی تحویل میں دے دیا گیا تھا۔عتیق احمد کے بڑے بیٹے علی احمد اس وقت جھانسی جیل میں قید ہیں۔ انہیں یکم اکتوبر2025 کونینی جیل سے جھانسی جیل منتقل کیا گیا تھا۔ بتایا جا رہا ہے کہ ابان احمد اپنے خاندان کے دیگرافراد اوردوستوں کے ساتھ انہی سے ملاقات کے لئے جا رہے تھے، لیکن منزل تک پہنچنے سے پہلے ہی یہ المناک حادثہ پیش آگیا۔

Source: Admin