چندی گڑھ:

پنجاب و دھان سبھا کے مون سون سیشن کے چوتھے دن، بھارتیہ جنتا پارٹی کے سینئر رکن اسمبلی اشونی شرما کے ایک متنازع اور غیر شائستہ بیان پر ایوان شدید ہنگامہ آرائی کا مرکز بن گیا۔ مرکزی فنڈز کی بندش سے متعلق عام آدمی پارٹی (AAP) کے التزامات پر ردعمل دیتے ہوئے بی جے پی لیڈر نے لڑکے اور لڑکی کی پیدائش کا موازنہ کیا، جس پر حکمران جماعت بالخصوص خواتین قانون سازوں نے سخت اعتراض کرتے ہوئے ان سے غیر مشروط معافی مانگنے کا مطالبہ کیا۔

توجہ دہانی نوٹسز کے دوران جب حکمراں جماعت نے مرکز کی جانب سے پنجاب کے فنڈز روکے جانے کا الزام لگایا، تو اشونی شرما نے معذرت کے ساتھ کہا: "اگر لڑکا پیدا ہو تو کہتے ہیں کہ آپ کی اپنی محنت کا نتیجہ ہے، اور اگر لڑکی پیدا ہو تو مرکز کو قصوروار ٹھہراتے ہیں۔"
شرما نے ریاستی حکومت سے سوال کیا کہ غیر قانونی ریت کے شعبے میں 'جس دا کھیت، اس دی ریت' اسکیم کا کیا ہوا؟ انہوں نے الزام لگایا کہ جو بھی غیر قانونی کان کنی کے خلاف آواز اٹھاتا ہے، عآپ کے سینئر رہنما اسے خاموش کرا دیتے ہیں۔
اس بیان کے فوراً بعد عآپ کی خواتین اراکینِ اسمبلی نے شدید ہنگامہ آرائی کی۔ جگراؤں سے عآپ کی رکن اسمبلی سروجیت کور مانوکے نے کہا کہ یہ بیان بی جے پی کی خواتین کے بارے میں تنگ نظر اور امتیازی سوچ کی عکاسی کرتا ہے۔
کابینہ وزیر امن اروڑا نے کہا کہ والدین کے لیے بیٹے اور بیٹیاں برابر ہوتے ہیں۔ انہوں نے اشونی شرما کو آڑے ہاتھوں لیتے ہوئے کہا کہ وزیر اعظم ایک طرف 'بیٹی بچاؤ، بیٹی پڑھاؤ' کا نعرہ دیتے ہیں اور دوسری طرف ان کے پارٹی رکن اسمبلی لڑکیوں کی اس طرح تذلیل کر رہے ہیں۔
ہنگامے کے بعد اشونی شرما نے سنسکرت کے اشلوک پڑھتے ہوئے کہا کہ ان کا مقصد کسی کی دل آزاری نہیں تھا بلکہ یہ ایک عام کہاوت تھی، وہ خواتین کا بے حد احترام کرتے ہیں۔ انہوں نے اپنے الفاظ کو ایوان کی کارروائی سے حذف کرنے کا بھی مطالبہ کیا۔

Source: Admin