غزہ میں شہری دفاع کے ادارے نے اتوار کے روز ہونے والی اسرائیلی بمباری کے بعد کہا ہے کہ اس بمباری میں کم از کم 33 فلسطینی جاں بحق ہوئے ہیں جن میں نصف سے زیادہ تعداد بچوں کی ہے۔ اسرائیل کی یہ بمباری اس جنگی جارحیت میں توسیع کے ایک روز بعد ہے جس کا اسرائیل نے ماہ مئی میں اعلان کیا تھا اور اپنے ریزرو فوجیوں کو بھی دوبارہ سے غزہ میں فوجی نفری بڑھاتے ہوئے بھیجنے کا فیصلہ کیا تھا۔ غزہ میں شہری دفاع کے ترجمان محمود باسل ںے بین الاقوامی خبر رساں ادارے 'اے ایف پی' کو بتایا کہ بمباری کے ایک واقعے میں جو المواصی پناہ گزین کیمپ میں لگے خیموں پر کی گئی۔ اس میں کم از کم 22 فلسطینی جاں بحق اور ایک سو کے لگ بھگ زخمی ہوگئے۔ یاد رہے المواصی کیمپ جنوبی غزہ میں قائم ہے۔ اس سے پہلے بھی اس پناہ گزین کیمپ پر متعدد بار اسرائیلی فوج بمباری کر چکی ہے۔ تاکہ بے گھر ہوچکے فلسطینیوں کو اس کیمپ میں بھی نشانہ بناتی رہے۔ ترجمان محمود باسل کے مطابق سات افراد شمالی غزہ کے علاقے جبالیہ میں ایک گھر پر بمباری کے نتیجے میں جاں بحق ہوئے۔ جبکہ العودہ ہسپتال کو بھی اس بمباری سے نقصان پہنچا۔ العودہ شمالی غزہ کے جبالیہ علاقے میں قائم ہے۔ دریں اثناء غزہ کے وسطی علاقے الزوائدہ اور خان یونس میں بھی بمباری کے مختلف واقعات میں کئی فلسطینی جاں بحق ہوئے ہیں۔ اسرائیلی فوج نے ہفتہ کے روز اعلان کیا تھا کہ وہ غزہ میں اپنی جنگی جارحیت کو شدید تر کر رہی ہے۔ تاکہ غزہ میں حماس کو شکست دے سکے۔ خیال رہے غزہ میں اسرائیلی فوج نے دو مارچ سے ناکہ بندی جاری رکھی ہوئی ہے۔ جسے اب اڑھائی ماہ ہو چکی ہیں۔ تاہم قطر میں جنگ بندی کے لیے مذاکرات جاری ہیں۔

Source: social media