حماس کے سینئر رہنما سامی ابو زہری نے غزہ پر دوبارہ اسرائیلی حملوں پر تبصرہ کرتے ہوئے کہا کہ اسرائیلی وزیراعظم کا غزہ میں کوئی ہدف پورا نہيں ہوگا۔ سامی ابو زہری نے مزید کہا کہ اسرائیل کا غزہ کی پٹی میں جنگ شروع کرنا یرغمالیوں کو سزائے موت سنانے کے مترادف ہے۔ دوسری جانب اسرائیلی فوج نے دعویٰ کیا ہے کہ 24 گھنٹوں میں غزہ کی پٹی میں حماس کے دفاتر اور عسکری بنیادی ڈھانچے کو بمباری کا نشانہ بنایا ہے۔ اسرائیلی فوج کے مطابق حملوں کا نشانہ بننے والے حماس کے اہداف اسرائیل کیلئے خطرات کے باعث تھے۔ اسرائیلی فوج کے مطابق غزہ میں مزید اہداف کو نشانہ بنا کر تباہ کرنے میں مصروف ہیں۔ دریں اثنا سعودی عرب نے اسرائیل کے غزہ پر دوبارہ حملے شروع کرنے کی شدید مذمت کی ہے۔ اس حوالے سے سعودی وزارت خارجہ نے کہا کہ غزہ پر اسرائیلی حملے دوبارہ شروع کرنے کی سخت الفاظ میں مذمت کرتے ہیں۔ سعودی وزارت خارجہ نے کہا عالمی برادری فلسطینیوں کے خلاف جرائم کو رکوائے، اسرائیلی فورسز کا غزہ کی پٹی کے رہائشی علاقوں پر براہ راست حملوں کی مذمت کرتے ہیں۔ سعودی وزارت خارجہ نے کہا کہ غزہ کے شہریوں کو اسرائیلی جنگی جنون سے تحفظ فراہم کیا جائے۔ سعودی وزارت خارجہ نے کہا فلسطینی عوام کی تکالیف کا خاتمہ کیا جائے۔ ادھر غزہ پر اسرائیلی حملے دوبارہ شروع ہونے پر ایران نے شدید مذمت کی ہے۔ ایرانی وزارت خارجہ نے کہا کہ فلسطینیوں کی نسل کشی مہم کے تسلسل کا ذمہ دار امریکا ہے۔

Source: social media