افغانستان میں "ڈاکٹرز ود آؤٹ بارڈرز" تنظیم کے دفتر نے اعلان کیا ہے کہ صوبہ بلخ میں 28 سالہ خاتون نے 5 جڑواں بچوں کو جنم دیا ہے۔ تنظیم نے پیر کے روز ایک پریس ریلیز میں بتایا کہ یہ بچے مزار شریف کے بو علی سینا ہسپتال میں پیدا ہوئے۔ دوسری جانب یورپی یونین نے افغانستان میں ماؤں اور نوزائیدہ بچوں کی صحت کی دیکھ بھال کو بہتر بنانے کے لیے جاری کوششوں پر روشنی ڈالی ہے۔ ساتھ یہ نشان دہی کی ہے کہ ملک کو اب بھی دنیا میں زچگی کے دوران ماؤں کی اموات کی بلند ترین شرح کا سامنا ہے۔ تنظیم نے ذکر کیا کہ بچوں کو انتہائی نگہداشت کے یونٹ (آئی سی یو) میں طبی امداد فراہم کی جا رہی ہے۔ بچوں کی والدہ نفیسہ (28 سال) کا کہنا ہے کہ ان کے بچے پہلے دن دودھ نہیں پی سکے اور ان میں سے ایک کی حالت تشویش ناک حد تک بگڑ گئی تھی۔ نفیسہ اس وقت اپنے ایک بچے کو کھونے کے خوف میں مبتلا تھی جب ڈاکٹروں نے اسے مطلع کیا کہ پانچوں بچوں کو قے اور یرقان جیسی علامات کا سامنا ہے۔ تاہم ہسپتال کے انتہائی نگہداشت کے یونٹ نے مسلسل دیکھ بھال اور ماہرانہ علاج کے ذریعے بچوں کی حالت پر قابو پا لیا ہے اور اب ان کی طبیعت بہتر ہو رہی ہے۔ یورپی یونین نے اتوار کے روز پلیٹ فارم "ایکس" پر ایک پوسٹ میں کہا کہ اس کے نمائندوں نے، اقوام متحدہ کے پاپولیشن فنڈ کے ہمراہ صوبہ لوگر میں زچگی کی دیکھ بھال کے ایک مرکز کا دورہ کیا جو دایہ (مڈوائف) کی خدمات پر انحصار کرتا ہے۔ یہ اطلاع افغان خبر رساں ایجنسی "خاما پریس" نے دی۔ یورپی یونین نے نشان دہی کی کہ اہلیت کے حامل ہیلتھ ورکرز، قبل از پیدائش نگہداشت، محفوظ زچگی کی سہولیات اور زچگی کے بعد کی دیکھ بھال تک رسائی حاصل ہونا، افغان ماؤں اور نوزائیدہ بچوں میں روکی جا سکنے والی اموات کو روکنے کے لیے اب بھی انتہائی اہم ہے۔ بین الاقوامی ہیلتھ ایجنسیوں نے طویل عرصے سے بارہا خبردار کیا ہے کہ صحت کی دیکھ بھال کی فنڈنگ میں خلل اور انسانی امداد میں کمی ملک بھر میں خواتین اور بچوں کو فراہم کی جانے والی بنیادی خدمات کو مزید نقصان پہنچا سکتی ہے۔

Source: Admin