سہارنپور، 05 ستمبر:اتر پردیش کے سہارنپور کلکٹریٹ احاطے میں تقریباً 70 سال پرانی مسجد کو عدالت کی جانب سے غیر قانونی قرار دیے جانے کے بعد ضلعی انتظامیہ نے ہفتہ کو منہدم کردیا۔ کارروائی کے پیش نظر کلکٹریٹ احاطے کے اندر اور باہر بڑی تعداد میں پولیس فورس تعینات کی گئی تھی۔پولیس کے ڈپٹی انسپکٹر جنرل ابھیشیک سنگھ نے صحافیوں کو بتایا کہ کلکٹریٹ احاطے میں واقع مسجد کو سٹی مجسٹریٹ کی عدالت نے غیر قانونی قرار دیا تھا۔ اس حکم کے خلاف مسجد کمیٹی نے پہلی اپیل دائر کی تھی، جسے عدالت نے خارج کرتے ہوئے سٹی مجسٹریٹ کے حکم کی توثیق کردی۔ اسی حکم کے تحت مسجد کو منہدم کرنے کی کارروائی کی گئی۔
انہوں نے بتایا کہ انہدام کی کارروائی ہفتہ کی صبح تقریباً 5 بجے شروع کی گئی۔ مسجد کے انہدام کے بعد سیاسی حلقوں میں بھی بحث تیز ہوگئی ہے ۔ سماج وادی پارٹی کے مقامی رہنما فیصل سلمانی نے انتظامیہ کی کارروائی پر اعتراض کرتے ہوئے کہا کہ انہدام کا فیصلہ عجلت میں لیا گیا ہے ۔ ان کا کہنا ہے کہ مقامی عدالت میں اپیل خارج ہونے کے بعد انہیں ہائی کورٹ جانے کے لیے وقت دیا جانا چاہیے تھا۔