ممبئی میں رامائن ایونٹ کے بعد رنبیر کپور سنیچر کی رات اپنی اہلیہ عالیہ بھٹ، اپنی فلم ’لو اینڈ وار‘ کے کو سٹار وکی کوشل اور ہدایت کار سنجے لیلا بھنسالی کے ساتھ باہر نکلے۔
ہندوستان ٹائمز کے مطابق اس ہفتے فلم کے تین فرسٹ لک پوسٹرز جاری کیے گئے تھے اور عالیہ و وکی نے سنیچر کی رات منیش ملہوترا کے لیے ریمپ واک بھی کی۔ گروپ نے پاپارازی کے لیے رُک کر تصاویر کھنچوائیں، لیکن فوٹو سیشن کے آخر میں ایک فوٹوگرافر کے بار بار آواز دینے پر ماحول بدل گیا۔
ایک ویڈیو سوشل میڈیا پر سامنے آئی ہے جس میں رنبیر، عالیہ، وکی اور سنجے کو ریستوران کے باہر ایک ساتھ پوز کرتے دیکھا جا سکتا ہے۔
رنبیر نے زیتونی سبز کرتا اور سیاہ جینز پہنی، عالیہ نے نیون گرین ڈریس اور وکی نے سفید شرٹ کے ساتھ سیاہ پینٹ پہنی۔ ایک موقع پر سنجے لیلا بھنسالی فریم سے باہر ہوتے نظر آئے تاکہ رنبیر، عالیہ اور وکی ساتھ پوز کر سکیں، لیکن رنبیر نے انہیں واپس بلا کر گروپ فوٹو میں شامل کیا۔
جب گروپ نے فوٹو سیشن ختم کر کے جانا شروع کیا تو ایک فوٹوگرافر بار بار رنبیر کو آواز دے کر عالیہ اور وکی کے ساتھ پوز کرنے کو کہتا رہا۔ اس پر رنبیر نے پلٹ کر جواب دیا کہ ’بہت بول رہا ہے تو ہاں۔‘ یہ کلپ سوشل میڈیا پر تیزی سے وائرل ہو گیا اور مداحوں نے اس مختصر مکالمے پر ردعمل دیا۔
یہ فلم ایک رومانوی وار ڈرامہ ہے۔ رپورٹس کے مطابق رنبیر اور وکی انڈین ایئر فورس کے افسران کا کردار ادا کر رہے ہیں جن کی زندگی عالیہ کے کردار سے جڑتی ہے اور جنگ کے پس منظر میں ایک محبت کا مثلث بنتا ہے۔ فلم میں سپریہ پاٹھک بھی اہم کردار میں ہیں۔