ایرانی فوج کے ترجمان محمد اکرمی نیا نے آج اتوار کو کہا ہے کہ امریکہ خطے کی کشیدہ صورتحال کے باعث ایران پر ایک اور حملہ کر سکتا ہے۔

انہوں نے مزید کہا کہ تہران کسی بھی محاذ آرائی کے لیے تیار ہے اور امریکہ کو مزید نقصان پہنچانے کی صلاحیت رکھتا ہے۔

دوسری جانب ایران نے کہا ہے کہ وہ آبنائے ہرمز کو دوبارہ کھولنے کے لیے پیش کی گئی 7 روزہ تجویز پر امریکہ کے حتمی جواب کا انتظار کر رہا ہے، تاہم امریکی صدر ڈونلڈ ٹرمپ کی جانب سے تجویز مسترد کیے جانے کے بعد تہران اپنی شرائط میں نرمی نہیں کرے گا۔

ایرانی وزیر خارجہ عباس عراقچی نے ہفتے کی رات دیر گئے کہا کہ تہران ٹرمپ کے بیانات سے آگاہ ہے، تاہم اسے ثالثوں قطر اور پاکستان کی جانب سے ابھی تک کوئی پیغام موصول نہیں ہوا۔

عراقچی نے کہا:امریکی صدر نے کچھ اچھی باتیں بھی کی ہیں، لیکن ان کے کئی بیانات متضاد بھی ہیں، جو بدقسمتی سے ہم ان سے اکثر سنتے ہیں۔

انہوں نے کہا کہ عالمی توانائی کے شعبے میں پیدا ہونے والی اس مشکل صورتحال کو صرف مذاکرات کے ذریعے حل کیا جا سکتا ہے۔