نئی دہلی، 26 ستمبر: بھارتیہ جنتا پارٹی (بی جے پی) کے رکن پارلیمنٹ روی شنکر پرساد نے ووٹر لسٹ کی خصوصی جامع نظر ثانی (ایس آئی آر) کے سلسلے میں الیکشن کمیشن پر کانگریس کی جانب سے لگائے گئے الزام کو بے بنیاد قرار دیتے ہوئے ہفتہ کو کہا کہ وہ جب جب ہارتی ہے ، تو اس طرح کے الزام لگاتی ہے ۔
مسٹر پرساد نے آج یہاں اپنی سرکاری رہائش گاہ پر صحافیوں سے بات چیت میں کہا کہ ووٹر لسٹ کی خصوصی جامع نظر ثانی (ایس آئی آر) کے معاملے پر کانگریس اور لوک سبھا میں اپوزیشن لیڈر راہل گاندھی الیکشن کمیشن پر شرمناک الزامات لگا رہے ہیں۔ وہ کمیشن کے بارے میں جھوٹ بول رہے ہیں۔ اس معاملے پر وہ ایک بار پھر بے نقاب ہوئے ہیں۔ وہ بار بار کیوں جھوٹے ثابت ہوتے ہیں؟
انہوں نے کہا کہ وہ (مسٹر گاندھی) جتنے بھی موضوعات اٹھاتے ہیں، سب میں سرعام مات کھاتے ہیں۔ چاہے وہ رافیل کا معاملہ ہو یا دیگر موضوعات، عوام انہیں کبھی سنجیدگی سے نہیں لیتی اور انہیں سپریم کورٹ میں بھی معافی مانگنی پڑی ہے ۔ انہوں نے الزام لگایا کہ کانگریس لیڈر آئینی اداروں کا احترام نہ کرنے کا کام کرتے ہیں۔
انہوں نے کہا کہ الیکشن کمیشن نے ایس آئی آر کے معاملے پر آج صورتحال واضح کی ہے اور بتایا ہے کہ ایس آئی آر کا فیصلہ اتفاق رائے سے لیا گیا تھا۔ سپریم کورٹ نے بھی ایس آئی آر کی حمایت کی ہے ۔ انہوں نے کہا کہ آج الیکشن کمیشن نے باقاعدہ اپنا بیان جاری کیا ہے ۔ آج کمیشن کی جو میٹنگ ہوئی، اس میں چیف الیکشن کمشنر گیانیش کمار اور دیگر دونوں کمشنر موجود تھے ۔ اس رپورٹ میں کہا گیا ہے کہ جتنے بھی فیصلے ایس آئی آر کو لے کر ہوئے ، وہ تمام الیکشن کمیشن کے چیف الیکشن کمشنر اور دیگر دونوں کمشنروں کی رضامندی سے ہوئے ہیں۔
بی جے پی لیڈر نے کہا، "میں ایک بار پھر اپوزیشن جماعتوں سے کہنا چاہتا ہوں کہ عوام کے درمیان جائیں، محنت کریں اور جیت حاصل کریں۔ ہم کیرالہ میں نہیں ہیں، کیا وہاں کانگریس جیتی تھی یا نہیں؟ ہماچل میں انتخابات ہوئے ، تلنگانہ میں انتخابات ہوئے ۔ کیا وہاں کانگریس پارٹی جیتی تھی یا نہیں؟"
انہوں نے کہا کہ جہاں اپوزیشن جماعتیں خاص طور پر کانگریس جیتی ہے تو سب کچھ ٹھیک رہتا ہے ، چاہے وہ کمیشن کے اہلکار ہوں، ووٹر لسٹ ہو یا ای وی ایم مشینیں، لیکن جب ہارتی ہے تو ہنگامہ کھڑا کرتی ہے ۔"