سرینگر، 26 ستمبر: جموں و کشمیر کی سابق وزیراعلیٰ اور پیپلز ڈیموکریٹک پارٹی (پی ڈی پی) کی سربراہ محبوبہ مفتی نے ہفتہ کو 'سیکولر سوچ' رکھنے والے لوگوں سے اپیل کی کہ وہ ملک میں جمہوریت اور بھائی چارے کے تحفظ کے لیے 29 ستمبر کو دہلی کے جنتر منتر پر ہونے والے احتجاجی مظاہرے میں حصہ لیں۔
محترمہ مفتی نے سوشل میڈیا پر کہا کہ یہ احتجاجی مظاہرہ دوپہر 2 بجے سے شام 5 بجے تک ہوگا اور انہوں نے ہندستان کی 'جمہوری اور سیکولر اقدار' کو ماننے والے لوگوں سے اس اجتماع میں شامل ہونے کی درخواست کی۔ انہوں نے اپنی پوسٹ میں ایک ویڈیو پیغام کے ذریعے الزام لگایا کہ مساجد، درگاہوں اور گرجا گھروں کو 'بے رحمی سے توڑا' جا رہا ہے اور دعویٰ کیا کہ اپوزیشن کے حامیوں اور 'سیکولر سوچ والے لوگوں، بالخصوص مسلمانوں' کے نام ووٹر لسٹ سے ہٹائے جا رہے ہیں۔
انہوں نے کہا، "ان تمام مظالم کے خلاف 'انڈین مسلم مانیٹرنگ کمیٹی' نے فیصلہ کیا ہے کہ وہ 29 ستمبر کو دوپہر 2 بجے سے شام 5 بجے تک دہلی کے جنتر منتر پر احتجاجی مظاہرہ کریں گے ۔" پی ڈی پی سربراہ نے سیکولر سوچ والے لوگوں سے اس احتجاج میں شامل ہونے کی اپیل کرتے ہوئے کہا کہ ان کی موجودگی جمہوریت کی حفاظت، ملک کی بہبود اور اس کی 'گنگا جمنی تہذیب' کو بچانے کی کوششوں میں مددگار ثابت ہوگی۔