National

"جینس پہننے سے اخلاق خراب نہیں ہوتے": دہلی ہائی کورٹ کی تنگ نظر سوچ اور دقیانوسی سوالات پر سخت برہمی

10/08/26

نئی دہلی: دہلی ہائی کورٹ نے ایک اہم فیصلے میں واضح کیا ہے کہ کسی عورت یا لڑکی کا لباس اس کا ذاتی انتخاب ہے اور عدالتوں میں اس کے کریکٹر پر سوال اٹھانے یا جرم کا الزام اسی پر ڈالنے کے لیے لباس کا سہارا نہیں لیا جا سکتا۔عدالت نے 2013 کے جینس اور مغربی لباس پہننے والی 17 سالہ لڑکی سے جنسی زیادتی کے ایک کیس میں ملزم کی بریت کا ٹرائل کورٹ کا فیصلہ منسوخ کر دیا۔
جسٹس چندرشیکھرن سودھا کی بنچ نے 50 صفحات پر مشتمل فیصلے میں کہا کہ عورت کا لباس اس کی عزت کو کم کرتا ہے اور نہ ہی اس کے خلاف ہونے والے غیر قانونی اقدام کا جواز بن سکتا ہے۔

عدالت نے زور دیا کہ حل خواتین کے کپڑوں پر پابندی لگانے میں نہیں بلکہ معاشرے اور والدین کی جانب سے بچوں کو اپنے رویے پر قابو پانے اور دوسروں کی حدود کا احترام سکھانے میں ہے۔
عدالت نے کیس میں مذہب اور مقامی روایت کا حوالہ دینے کی سخت مذمت کرتے ہوئے کہا کہ تعزیراتِ ہند اور پوکسو ایکٹ جیسے قوانین بلا تفریقِ مذہب سب پر یکساں لاگو ہوتے ہیں۔

عدالت نے وکیلِ صفائی کی جانب سے متاثرہ لڑکی کے لباس سے متعلق کیے گئے سوالات کو تذلیل آمیز قرار دیتے ہوئے ٹرائل جج کو سخت تنقید کا نشانہ بنایا کہ انہوں نے ایسے سوالات کی اجازت کیوں دی۔

Source: Admin