National

جھارکھنڈ: بھرتی امتحانات میں بے ضابطگیوں کے خلاف بھوک ہڑتال پر بیٹھے رہنما دیویندر ناتھ مہتو ہسپتال منتقل

10/08/26

رانچی: جھارکھنڈ جمہوری کرانتی مورچہ کے رہنما دیویندر ناتھ مہتو کو، جو بھرتی امتحانات میں مبینہ بے ضابطگیوں کے خلاف نو دنوں سے بھوک ہڑتال پر تھے، حالت بگڑنے پر ہسپتال منتقل کر دیا گیا ہے۔ اسمبلی کے قریب طلباء کے احتجاجی مارچ کے دوران پولس لاٹھی چارج میں شدید زخمی ہونے کے بعد ان کی صحت تشویشناک بتائی جا رہی ہے۔
رانچی صدر ہسپتال کی میڈیکل آفیسر نینسی پریا کے مطابق، بلڈ شوگر کی سطح میں خطرناک حد تک کمی کے بعد دیویندر ناتھ مہتو کو ایمرجنسی وارڈ میں داخل کرایا گیا ہے، جہاں ان کا علاج جاری ہے۔

سرکاری ملازمتوں کے خواہش مند طلباء اور نوجوانوں نے پیر کے روز جھارکھنڈ اسمبلی کا گھیراؤ کرنے کی کوشش کی۔ مظاہرین کو منتشر کرنے کے لیے پولس نے واٹر کینن، آنسو گیس کے گولے اور لاٹھی چارج کا استعمال کیا۔

پولس اور مظاہرین کے درمیان ہونے والے اس تصادم میں کئی احتجاجی طلباء اور چار پولس اہلکار بھی زخمی ہوئے ہیں۔

دیویندر ناتھ کے معاون پنکج کمار نے دعویٰ کیا ہے کہ نو دن کی بھوک ہڑتال کی وجہ سے وہ پہلے ہی کمزور تھے اور پولس کے لاٹھی چارج میں شدید زخمی ہونے سے ان کی حالت مزید خراب ہو گئی۔

ملازمتوں میں مبینہ بے ضابطگیوں اور دھاندلی کے خلاف طلباء کے اس احتجاج نے ریاست کی سیاست میں شدید ہلچل مچا دی ہے۔

Source: Admin