چنئی، 12 دسمبر : تمل ناڈو کے ڈنڈی گل ضلع میں جمعرات کی رات ایک نجی اسپتال میں آگ لگنے کے واقعہ میں کم از کم سات افراد کے مارے جانے کا خدشہ ہے۔ مصدقہ رپورٹس کے مطابق کم از کم دو سے تین لاشیں برآمد کی گئی ہیں۔ رپورٹ میں کہا گیا ہے کہ اسپتال لے جاتے وقت دو افراد کی موت ہو گئی۔ مزید یہ کہ کم از کم چھ افراد اسپتال کی لفٹ میں پھنسے ہوئے تھے اور انہیں بچانے کی کوششیں جاری ہیں۔ مقتولین میں ایک تین سالہ بچہ بھی شامل ہے اور کہا جا رہا ہے کہ چار منزلہ اسپتال کی عمارت میں کئی مریض پھنسے ہوئے ہیں۔ عمارت میں لگی آگ کو بجھانے کے لیے فائربریگیڈ کے اہلکار، محکمۂ محصولات، پولیس اور ضلع افسران موقع پر پہنچ گئے ہیں۔ مقامی لوگ بھی بچاؤ کے کام میں حصہ لے رہے ہیں۔ ضلع کلکٹر محترمہ پونگودی بھی بچاؤ کے کام کی نگرانی کے لیے موقع پر پہنچیں کیونکہ آگ ابھی بھی دہک رہی تھی۔ مریضوں کو دوسرے اسپتالوں میں منتقل کرنے کے لیے 50 سے زائد ایمبولینسز تعینات کی گئی ہیں۔ آگ لگنے کی وجہ ابھی تک معلوم نہیں ہو سکی۔

Source: uni news