عراقی حکومت کے ایک عہدیدار اور ہوائی اڈے کے ایک ذریعے نے فرانسیسی خبر رساں ادارے اے ایف پی سے بات کرتے ہوئے کہا کہ امریکہ نے عراقی ایئرلائنز کو پابندیوں سے مشروط استثنیٰ دے دیا ہے، جس کے تحت وہ شیعہ مسلمانوں کے مقدس شہر نجف اور ایران کے درمیان ایرانی زائرین کو لانے لے جانے کے لیے پروازیں چلا سکیں گی۔
عراقی عہدیدار نے کہا کہ ’عراقی ایئرلائنز کو نجف اور ایران کے درمیان پروازیں چلانے کے لیے مشروط استثنیٰ حاصل ہو گیا ہے۔‘
ہوائی اڈے کے ذریعے نے بتایا کہ ’ہوائی اڈے کو گزشتہ روز مطلع کیا گیا تھا کہ عراقی ایئرلائنز ایران کے لیے پروازیں چلا سکتی ہیں، تاہم فی الحال پروازوں کا کوئی شیڈول طے نہیں کیا گیا۔‘
عراقی حکومت نے گزشتہ ہفتے کہا تھا کہ وہ ایران کے فضائی شعبے پر امریکی پابندیاں نافذ ہونے کے بعد امریکہ سے استثنیٰ حاصل کرنے کے لیے مذاکرات کر رہی ہے۔
ایرانی ایئرلائنز بڑی تعداد میں عراقی شیعہ زائرین کو ایران کے مقدس شہروں تک پہنچاتی ہیں، جبکہ ایران سے عراق آنے والے افراد بھی ان پروازوں کے ذریعے وہاں موجود مقدس مقامات کی زیارت کرتے ہیں۔ ان پروازوں سے ایران میں زیرِ تعلیم عراقی طلبہ اور علاج کے لیے ایران جانے والے عراقی مریض بھی استفادہ کرتے ہیں۔
امریکی پابندیوں پر عمل درآمد کرتے ہوئے عراق متحدہ عرب امارأت سمیت اُن متعدد ممالک کی فہرست میں شامل ہو گیا تھا جنہوں نے ایران کی فضائی کمپنیوں کے خلاف امریکی پابندی نافذ کی۔ امریکی وزیرِ خزانہ سکاٹ بیسنٹ نے کہا تھا کہ ایرانی ایئرلائنز کو’بند کر دیا جائے گا‘۔
سکاٹ بیسنٹ نے سنیچر کو کہا تھا کہ انہوں نے دنیا بھر میں اپنے نمائندے بھیجے ہیں تاکہ مختلف ممالک پر ایران کو معاشی طور پر تنہا کرنے کے لیے دباؤ ڈالا جا سکے۔ انہوں نے ایران کی ایئرلائنز اور بینکوں کو نشانہ بنانے کے لیے عائد کی گئی نئی پابندیوں کو بھی سراہا۔