National

"امریکہ میں اڈانی کلین چٹ، ہندستان میں سیاسی بھونچال: راہل گاندھی کا مودی سرکار پر قومی مفادات کے سودے کا الزام!"

12/08/26

نئی دہلی:
لوک سبھا میں قائد حزب اختلاف (اپوزیشن لیڈر) راہل گاندھی نے معروف صنعت کار گوتم اڈانی کے خلاف امریکی عدالت کی جانب سے مجرمانہ الزامات کو ختم کیے جانے کے فیصلے پر شدید شک و شبہات کا اظہار کیا ہے اور اس پیش رفت کے بعد وزیراعظم نریندر مودی پر سخت حملہ بولا ہے۔

سوشل میڈیا پلیٹ فارم 'ایکس' پر ایک تند و تیز پوسٹ کرتے ہوئے کانگریس رہنما نے لکھا:

"یہ معاملہ جیسا نظر آتا ہے، حقیقت میں اس سے کہیں زیادہ گہرا ہے۔ ایک سمجھوتہ شدہ (کمپرومائزڈ) وزیراعظم کو ہندستان کے قومی مفادات کا سودا کرنے پر مجبور کیا گیا۔ آج پورا ہندوستان اس کی بھاری قیمت چکا رہا ہے۔"

راہل گاندھی کا یہ ردعمل امریکی عدالت کے اس فیصلے کے بعد سامنے آیا ہے جس میں گوتم اڈانی، ساگر اڈانی اور ان کے ساتھی ونیت جین کے خلاف طویل عرصے سے زیر التوا مجرمانہ کیس کو ختم کر دیا گیا۔ امریکی حکومت کی جانب سے باضابطہ درخواست کے بعد عدالت نے ان کے خلاف تمام الزامات کو خارج کرتے ہوئے اس قانونی کارروائی کا خاتمہ کر دیا۔

اس فیصلے کے بعد بھارت کی سیاسی فضا میں ایک بار پھر اڈانی معاملے کو لے کر سرگرمیاں تیز ہو گئی ہیں اور اپوزیشن نے حکومت کو گھیرنا شروع کر دیا ہے۔

Source: Admin