نئی دہلی:
پارلیمنٹ کے مانسون سیشن کے دوران بدھ کے روز حکومت اور اپوزیشن کے درمیان ایک بار پھر شدید محاذ آرائی دیکھنے کو ملی۔ ایوان کی کارروائی کے آغاز سے ہی دونوں فریقین کے درمیان تلخ کلامی ہوئی اور مختلف متنازع امور پر بحث کے مطالبات کو لے کر ہنگامہ آرائی شروع ہو گئی۔

دہلی میں نیت ( امتحان کے خلاف پرامن احتجاج کرنے والے طلبہ پر مبینہ پولیس بربریت کا معاملہ لوک سبھا میں گونجا۔ اپوزیشن اراکین نے حکومت کے خلاف شدید نعرے بازی کی اور واقعے کی مذمت کی۔ ہنگامے کے باعث ایوان کی کارروائی کو دوپہر 2 بجے تک کے لیے ملتوی کرنا پڑا۔

دوسری جانب، جھارکھنڈ کے بی جے پی اراکینِ پارلیمنٹ نے بھی جھارکھنڈ میں مظاہرین پر لاٹھی چارج اور لوک سبھا میں اپوزیشن لیڈر راہل گاندھی کے خلاف احتجاجی نمائش کی۔

راجیہ سبھا میں اپوزیشن لیڈر اور کانگریس کے قومی صدر ملکارجن کھڑگے نے غیر ملکی امداد کی تنظیم (FCRA) بل سے متعلق میڈیا سے بات کرتے ہوئے کہا کہ اس بل کو حتمی شکل دینے سے پہلے جوائنٹ پارلیمانی کمیٹی کے پاس بھیجا جانا چاہیے۔ آئندہ کے لائحہ عمل پر بات کرتے ہوئے کھڑگے نے کہا:

"کل کچھ نیا نہیں ہوگا، ہم اپنی جمہوری جدوجہد اور مطالبات اسی طرح جاری رکھیں گے جیسے اب تک کرتے آئے ہیں۔"

کانگریس ایم پی مانک ٹاگور نے لوک سبھا میں ایک تحریک التوا کا نوٹس دیا، جس میں ملک بھر کے مندروں سے سونے، چاندی، نقد رقم اور دیگر قیمتی اشیاء کی مبینہ چوری اور بے ضابطگیوں پر ہنگامی بحث کا مطالبہ کیا گیا۔

نوٹس میں ایودھیا کے رام مندر کا خصوصی ذکر کرتے ہوئے کہا گیا کہ حال ہی میں وہاں عطیات اور نقد رقم کی گنتی اور سیکیورٹی میں شدید لاپرواہی کی اطلاعات سامنے آئی ہیں، جس سے عقیدت مندوں میں شدید تشویش پھیلی ہے۔


انہوں نے حکومت سے مطالبہ کیا کہ وہ مندروں میں سی سی ٹی وی سیکیورٹی، آڈٹ، اور کیش کاؤنٹنگ کے نظام کو شفاف بنانے کے لیے اٹھائے گئے اقدامات کی وضاحت کرے۔

کانگریس ایم پی منیش تیواری نے بھی لوک سبھا میں وقفہ سوالات اور وقفہ صفر کو منسوخ کر کے سیاسی مفاد پرستی کے تحت ہونے والی دل بدلی کو روکنے کے لیے ایک نئے اور سخت سیاسی دل بدلی مخالف قانون کے خدوخال پر فوری بحث کرانے کا نوٹس دیا۔

Source: Admin