International

کولمبیا زلزلہ، ہلاکتیں 250 سے تجاوز کرگئیں

12/08/26

کولمبیا میں پیر کے روز آئے شدید زلزلے سے اموات کی تعداد 254 ہو گئی۔
ان میں پیریرا میں 101 جبکہ ملک کے تیسرے بڑے شہر کالی میں 95 افراد کی ہلاکتیں رپورٹ ہوئی ہیں۔
غیرملکی میڈیا کے مطابق زلزلے سے متاثرہ علاقے بجلی اور بنیادی سہولتوں سے محروم ہیں۔

کولمبین حکام کا کہنا ہے کہ زلزلے سے ہونے والی تباہی اور ہلاکتوں کی تعداد معلوم کرنے میں کئی دن لگ سکتے ہیں۔

یاد رہے کہ مغربی کولمبیا میں7 اعشاریہ 4 شدت کے تباہ کن زلزلے کے باعث درجنوں عمارتیں گر گئی تھیں۔

کولمبین حکام کے مطابق زلزلے سے ملک کے 6 ہوائی اڈوں کو نقصان پہنچا، متعدد پروازیں معطل ہوگئیں، زلزلے جھٹکے پیرو، ایکواڈور، پانامہ اور وینزویلا میں بھی محسوس کیے گئے۔

صوبہ چوکو میں درجنوں عمارتیں ملبے کا ڈھیر بن گئیں، منیزالیس شہر میں تاریخی چرچ کے مینار زمین بوس ہوگئے، تباہ ہونے والی عمارتوں اور ملبے کے درمیان متعدد افراد لاپتہ ہیں جن میں ہلاکتوں کی اطلاعات ہیں۔
بوگوٹا فائر ڈیپارٹمنٹ کے مطابق امدادی ٹیموں نے پیریرا شہر میں 36 گھنٹوں سے ملبے تلے پھنسی ایک خاتون کو زندہ نکال لیا ہے۔

کولمبیا کے وزیر داخلہ روڈریگو لارا نے سوشل میڈیا پلیٹ فارم ایکس پر ایک پیغام میں بتایا کہ 32 سالہ ڈینییلا لارگو سانچیز ایک ہوٹل کے ملبے کے نیچے سے ملیں۔

انھیں فوری طور پر ایک مقامی طبی مرکز منتقل کیا گیا، جہاں ان کا علاج جاری ہے۔

صدر ابیلارڈو دے لا ایسپرییلا کے مطابق پیریرا میں امدادی کارکن اب بھی 40 سے زیادہ لاپتا افراد کی تلاش میں مصروف ہیں۔