امبالہ :

ہریانہ کے ضلع امبالہ میں تاریخی گرودوارہ شری پنجوکھرا صاحب میں خالصتان مخالف سکھ رہنما گرسمرن سنگھ منڈ کے ساتھ ہونے والی ہاتھ پائی اور بعد ازاں پولیس کارروائی کے خلاف صورتحال انتہائی کشیدہ ہو گئی ہے۔ پولیس اور مظاہرین کے درمیان شدید تصادم کے نتیجے میں ڈی ایس پی کرائم وریندر کا ہاتھ کٹ گیا جبکہ دیگر 6 پولیس اہلکار شدید زخمی ہو گئے۔

یہ تنازع 7 اگست کو اس وقت شروع ہوا جب انٹرنیشنل اینٹی خالصتان ٹیررسٹ فرنٹ کے صدر گرسمرن سنگھ منڈ گرودوارہ پنجوکھرا صاحب پہنچے۔

ان کا دعویٰ تھا کہ گرودوارہ میں داخلے کے وقت نہنگوں نے انہیں روکا اور تیز دھار ہتھیاروں و ڈنڈوں سے حملہ کیا۔

کمیٹی نے ان الزامات کی تردید کرتے ہوئے کہا کہ منڈ کی لاپرواہی سے گاڑی چلانے کی وجہ سے کچھ زائرین (سنگت) زخمی ہوئے تھے۔

پولیس نے سکھ نوجوانوں کے خلاف ایف آئی آر درج کر کے 2 افراد کو گرفتار کر لیا، جبکہ سکھ برادری کی جانب سے منڈ کے خلاف دی گئی درخواست پر کوئی کارروائی نہیں کی گئی، جس سے عوامی غصہ بھڑک اٹھا۔

یکطرفہ کارروائی کے خلاف ہریانہ سکھ گرودوارہ پربندھک کمیٹی کے صدر جگدیش سنگھ جھنڈا کی قیادت میں اجلاس کے بعد مظاہرین نے جی ٹی روڈ جام کرنے کا فیصلہ کیا۔

مظاہرین نے پولیس کی جانب سے لگائے گئے تین مختلف مقامات کے بیری کیڈز توڑ ڈالے اور ٹریکٹروں و کنٹینروں کی مدد سے سڑک کو مکمل بند کر دیا۔

پولیس نے ہجوم کو منتشر کرنے کے لیے مسلسل آنسو گیس کے گولے داغے لیکن مظاہرین پیچھے نہ ہٹے اور دیر شام تک ڈٹے رہے۔

شاہراہ بند ہونے کی وجہ سے پنجاب، چندی گڑھ، ہماچل پردیش اور جموں و کشمیر کا رابطہ منقطع ہو گیا۔ اسکول کے بچے، ایبولینسیں اور عام شہری 6 سے 7 گھنٹے تک سڑکوں پر پھنسے رہے۔

مظاہرین دو اہم مطالبات پر اڑے ہوئے ہیں:

گرسمرن سنگھ منڈ کے خلاف فوری طور پر ایف آئی آر (FIR) درج کی جائے۔

منڈ پر حملے کے الزام میں گرفتار کیے گئے دونوں سکھ نوجوانوں کو فوری طور پر رہا کیا جائے۔

بالآخر 7 گھنٹے بعد پولیس نے شاہراہ کو کھلوانے کے لیے لاٹھی چارج کیا۔ امبالہ کے ایس پی اجیت سنگھ شیکھاوت کے مطابق

"جب پولیس ٹیم جام کھلوانے پہنچی تو ہجوم میں موجود کچھ شرپسند عناصر نے تیز دھار ہتھیاروں سے جان لیوا حملہ کر دیا۔ اس حملے میں ڈی ایس پی کرائم وریندر کا ہاتھ شدید زخمی ہو کر کٹ گیا، جبکہ 5 سے 6 دیگر پولیس اہلکار بھی شدید زخمی ہوئے۔"

دوسری جانب، پولیس لاٹھی چارج اور بیری کیڈز کی زدمیں آنے سے گرودوارہ کمیٹی کے صدر جگدیش سنگھ جھنڈا سمیت متعدد مظاہرین اور کسان بھی زخمی ہوئے ہیں۔ فی الحال علاقے میں صورتحال انتہائی کشیدہ ہے اور بھاری پولیس نفری تعینات ہے۔

Source: Admin