Entertainment

عالمی جنگوں کے باعث تیمور اور جے خوفزدہ ہیں: سیف علی خان کا انکشاف

17/08/26

بالی ووڈ اداکار سیف علی خان نے انکشاف کیا ہے کہ دنیا بھر میں جاری جنگوں اور کشیدہ صورتِ حال کے باعث ان کے بیٹے تیمور علی خان اور جے خوفزدہ رہتے ہیں۔

56 سالہ سیف علی خان نے اپنی اہلیہ کرینہ کپور خان کے ساتھ اپنے دونوں بیٹوں تیمور اور جے کے حوالے سے بات کرتے ہوئے دنیا میں جاری بحرانوں پر تشویش کا اظہار کیا۔

این ڈی ٹی وی کے پروگرام کے سلسلے میں جموں و کشمیر کے علاقے اُڑی کے دورے کے دوران سیف علی خان نے گفتگو کرتے ہوئے بتایا کہ میرے بچے دنیا میں جاری متعدد جنگوں کے بارے میں سوال کرتے ہیں اور موجودہ صورتِ حال سے خوفزدہ بھی ہیں۔

سیف علی خان نے کہا کہ میرے بچے پوچھتے ہیں کہ ہماری حفاظت کون کر رہا ہے؟ آگے کیا ہو گا؟ کیا صورتِ حال مزید خراب ہو جائے گی؟

اداکار کے یہ بیانات ایسے وقت میں سامنے آئے ہیں جب 28 فروری سے جاری امریکا، اسرائیل اور ایران کے درمیان جنگ نے بھی دنیا بھر میں تشویش پیدا کر رکھی ہے۔

واضح رہے کہ سیف علی خان اپنی آنے والی فلم ’حیوان‘ کی ریلیز کی تیاریوں میں مصروف ہیں، جس میں وہ اکشے کمار کے ساتھ نظر آئیں گے۔

پریا درشن کی ہدایت کاری میں بننے والی کرائم تھرلر فلم ’حیوان‘ میں سیف علی خان اور اکشے کمار کی 18 سال بعد دوبارہ ایک ساتھ واپسی ہو گی، فلم 11 ستمبر کو بھارت بھر کے سنیما گھروں میں ریلیز ہونے والی ہے۔

Source: Admin